231/2023-2024 

Champhai, the 26th April, 2023: Vawiin khan Pu Ramthanmawia, East Tuipui bialtu MLA & Vice Chairman, Bamboo Link Road Board chuan Vangchhe High School kum 25-na tlin (Silver Jubilee) lawmna hun Khuallian niin a hmanpui.

Khuallian Pu Ramthanmawia chuan High School tha tak mai an neih avanga Vangchhe khawtlang a lawmpui thusawiin, Vangchhe High School-in Pathian hruaina changa silver jubilee an thleng chu lawmawm a tih thu a sawi a. High School tha tak nei thei tura hruaitu hmasa leh Zirtirtu lo ni tawhte thawhrimna fakawm a tih thu a sawi bawk.

Pu Ramthanmawia chuan Sawrkarin zirna a ngaih pawimawh thu leh a bial chhunga zirna kawnga hmasawn theih nan Zirtirtu thar tam tak Sawrkarin a pe chu lawmawm a tih thu a sawi a. Nu leh pate leh Sawrkar tangrualin zirna kawnga hma kan sawn theih nan theihtawp kan chhuah a, kan tanrualna avangin School naupang pawh kum tin an pung chho zel a, School khar mai tura ngaih tawh pawh kan chhanchhuak nual a ni, a ti bawk a. Kalkhawmte chu social media hman chin tawk thiam tur leh, social media kaltlanga thu thehdarhte finfiah hmasa lova awih mai lo turtein a chah a. Midangte thil tih dan sawisel mai lova nunkawng dik zawha midangte thil tha kawhhmuhtu nih tum turte, hruaitu hmasate sawisel mai lova, ram leh hnam tana an hnathawhte hriatpui zawk thin turtein a chah a ni.

Khuallian East Tuipui bialtu MLA Pu Ramthanmawia chuan Vangchhe High School Silver Jubilee lungphun hawngin Souvenir a tlangzarh a. Jubilee lawmna programme hi Vangchhe High School-ah khawtlang huapa neih niin, Pu F.Malsawmtluanga, VCP & Jubilee Organising Committee Chairman-in a kaihruai a. Pu T.Lalthanzama, Headmaster, Govt. Vangchhe M/S in hunserh a hmang a, School chanchin Vangchhe H/S Headmaster & Jubilee Organising Committee Secretary Pi T.Lalpekthari hnen atangin ngaihthlak a ni.

Vangchhe High School hi kum 1998 ah din niin, kum 1999 ah Sawrkar pawmpuina an hmu a. Kum 2003 ah Lumpsum Grant-in- Aided-ah hlankai niin, kum 2008 ah Adhoc Grant-in-Aided-ah hlankai leh a ni. He School atang hian Zirlai 160 in HSLC Examination hmachhawn tawhin heng zinga Zirlai 114 te chuan HSLC Examination an pass tawh a ni.

East Tuipui bialtu MLA Pu Ramthanmawia chuan nimin khan Sesih khuain khawtlang tana a hnathawhte avanga an chawimawina, Sesih Community Hall-a buatsaih chu a telpui bawk a ni.