230/2023-2024
Champhai, the 26th April, 2023: Vawiin chawhnu dar 2:30 khan Health Minister Dr. R. Lalthangliana chuan District Hospital Champhaiah RT-PCR Laboratory, Paediatric Intensive Care Unit (PICU) leh Trauma Centre a hawng. He hunah hian Health Minister hi Law & Judicial Minister Pu T.J. Lalnuntluanga, Champhai South bialtu MLA leh H&FW Board Vice Chairman Dr. ZR. Thiamsanga, Champhai North bialtu MLA te'n an tawiawm a ni.

Khuallian Health Minister Dr. R.Lalthangliana chuan District Hospital Champhai hmasawnna chu chhuanawm a tih thu leh a enkawl zui zel kawngah neitu thinlung put that a pawimawh thu a sawi a. Hmanraw changtlung tak tak nena thuam, damlo nazual enkawlna tur khum 50 awmna Critical Care Block (CCB), Mizorama hmasa ber tur cheng vaibelchhe 20 senga din tum nih thu leh, Integrated Public Health Laboratory (IPHL) cheng nuai 120 senga din tum a nih thu a sawi a. District thar pathum, Khawzawl, Saitual leh Hnahthialah District Hospital changtlung tak leh Staff Quarters tur engemawzat cheng nuai 1,700 senga sak a nih tur thu a sawi bawk a. Damdawiin hrang hrang leh Healh Sub-Centre te dinhmun sang zawka hlankai a nih thu a sawi bawk a. Heath Care Bill-te pawh hun reilote hnuah engemawzah suatkian theih beisei a ni, a ti a. Asian Development Bank atangin health care bill atan vaibelchhe 1000 hmuh beisei a ni a, a hlawhtlin hunah health care bill tangte tihfel vek beisei a ni, a ti bawk a. Heng bakah hian ICU 60 dawn neih a ni a, ZMC ah khum 480 dawn neih ni tawhin, Oxygen Plant pawh District zawng zawngah bunfel vek tawh a ni, a ti bawk.

Health Minister chuan JICA nena tangdunin Zemabawkah cheng nuai 70,000 senna tur Cancer Superspeciality Hospital din tum a nih thu a sawi a, kum 2028 ah zawhfel hman beisei a ni, a ti a. Zoram Medical College (ZMC) a first batch te'n result tha tak an nei chu lawmawm a tih thu sawiin, PG zirna turte pawh chak taka bawhzui a ni, a ti a. Nursing School Champhaia kalpui thuai a nih theih nan ngawrh taka hmalak a nih thu a sawi a. Thil tha tam tak neih vek sen rih loh mah nise, kan neih chhun ang angte uluk taka enkawl hi kan zavaia mawhphurhna a ni, a ti a. Midang tana thiamna hman leh luanchhuah chu Health Department kentel pawimawh tak a nih thu sawiin, thawktute chu tihtakzeta thawk tur leh, midang tana malsawmna ni tura inpekna thinlung pu tlat turin a fuih a ni.

Law & Minister Pu T.J. Lalnuntluanga, Champhai South bialtu MLA chuan Champhaiin hmasawnna bung thar a kai chu hmuh nuam a tih thu leh lawmawm a tih thu a sawi a. District Hospital Champhai tih changtlung kawnga Sawrkar hmalaknate tarlangin, tun hma ngaihtuahin hmasawnna tam tak a thleng a, hengte hian min tihlim takzet a, a ti a. Thu lawmawm leh hlawhtlinnate ngaihhlut nachang hriat a pawimawh thu leh, Sawrkar hmalaknate tha taka tawiawm zel a pawimawh thu a sawi a. Hripui lenlai leh mipuite hriselna kawnga theihtawp chhuah thintu Health Minister leh Department thawktute inpekna fakawm a tih thu a sawi a. Health Minister chu zofate tana hmun pawimawh tak leh damlote pan nasat District Hospital Champhai thuamthat leh thawktu indaihlohna phuhruk kawnga theihtawp chhuahpui tur te, Nursing School ataka kalpui thuai a nih theih nana hmalakpui tur leh khawl pawimawh MRI, CT Scan, Solar Plant leh adangte bun tura hmalakpui turtein a ngen nghal bawk.

H&FW Board Vice Chairman Dr. ZR. Thiamsanga, Champhai North bialtu MLA chuan hrileng vanga hun khirh tak tawh karah health infrastructure tih changtlung kawnga theihtawp chhuah a ni leh rah tha tak hmuh a ni chho mek zel chu lawmawm a tih thu a sawi a. Hriselna mai bakah inkalpawhna kawngpui, nitin mamawh ei leh bar, tui, zirna, kawlphetha leh adangahte hmasawnna hmuh tur a awm chu fakawm a tih thu a sawi a. Faina leh hmasawnna kawnga District Hospital Champhai tanlakna chhuanawm tiin, thawktute theihtawp chhuah zel turin a fuih bawk.

Hawnna puala inkhawm Hospital OPD a neih hi Pi Esther Lalruatkimi, Principal Secretary, H&FW Department chuan kaihruaiin, Rev. H.Lalrinmawia, Director, Synod Rescue Home, Champhaiin hunserh a hmang a. Dr. Eric Zomawia'n report pein, Pu Lalfakzuala, Sr. Executive Engineer, H&FW Department-in technical report a pe a. Dr. Zatluanga, District Medical Superintendent, Champhaiin lawmthu sawiin hun hman a khar a ni.

RT-PCR Laboratory hi District Hospital Eye Ward Building-ah bun niin, square metre 252 a zau a awh a. DHME, H&FW Department sum cheng nuai 21 senga din a ni. January ni 10, 2022 ah bultan niin, April ni 6, 2023 ah zawhfel a ni. RT-PCR Laboratory hian a kentel component hrang hrang 13 a nei a, RT-PCR khawl kaihhnawih hmanraw hrang hrang 17 lei a ni bawk.

District Hospital Champhaia Paediatric Intensive Care Unit (PICU) hi Sawrkar laipui Emergency Covid Response Package II sum cheng nuai 14.40 senga sak niin, National Health Mission, H&FW Department kaltlanga thawh a ni a. April ni 30, 2022 khan sak tan niin, November ni 30, 2022 ah zawhfel a ni. A zau zawng hi square metre 195 a ni a. ICU Room leh HDU Room bakah a kentel component dang 4 a tel a. NHM kaltlanga siam naupang ICU, Paediatric Intensive Care Unit (PICU) hi Mizorama District Hospital 6 ah siam a ni a, Champhai a mi hi hawnfel 2-na a ni. ICU hmanraw hrang hrangte lei niin, naupang damlo nazual enkawlna turte an ni hlawm a. ICU, HDU leh General Ward-te nena kalkawp vek thei tura ruahman a ni.

District Hospital Champhaia Trauma Centre hi Sawrkar laipui Ministry of H&FW sum cheng nuai 80.83 senga din a ni a. L.B Associates (Pvt) Ltd. Bungkawn Veng te thawh niin, June ni 22, 2018 khan bultan a ni a, April ni 3, 2023 ah zawhfel a ni. Square metre 209 a zau awhin, ICU khum 5 Trauma Ward khum 5, Nursing Station bakah component pawimawh dangte a kengtel a ni.

Program hman zawh hnu hian District Hospital Champhaia Critical Care Block (CCB) sakna tur hmunhma Health Minister hova enfiah a ni.