Nimin August 22 khan Govt. Deputy Chief Whip Pu R.L Pianmawia chuan a bial chhung Keprana leiminna hmun a tlawh.

August ni 20-a Kepran leimin hian In pathum a chhilh a, in pakhat erawh a chhilh hma in thiah hman a ni. Leimin hian metre 69 zet a thui a awh a, chung lam lei tlahniam hi a thenlaiah phei chuan ft 12 a thukin a khi chat a ni. A hmuna han tlawhtu MLA leh officer rualte chuan kawnga lei tla leh mai thei tura langte chu slope deuhva paih thlak belh ni se, PWD ten gabion wall siam se tih leh motor kal tlang reng theih turin PWD lam hian vil ngun se tih te an rawt a. Leiminna hmun hi Geology Department-in uluk zawkin zir chiang se an ti bawk.

Govt. Deputy Chief Whip Pu R.L. Pianmawia hi Sakawrdai SDO (C) Pu Lawmkima, BDO Darlawn Pu H.Zonunmawia, Geology & Mineral Resources Technical Officer Pu Zarzoliana leh Darlawn PHE SDO Pu Rohmingliana ten an tawiawm a. Anni bakah hian Chalhfilh Group YMA President leh khawtlang hruaituten an tawiawm bawk a ni.