Law Commission Chairman Pu R.Lalrinawma, MLA chuan vawiin chawhnu dar 1:00 khan Sihphir Venghlun ah Health Clinic Centre a hawng.
Clinic Centre hawnna thu sawiin Pu R.Lalrinawma chuan mipui lo pung zel leh khua lo thang zelin an mamawh em em Health Clinic Centre, Sihphir Venghluna hawn a ni thei chu lawmawm tiin chak taka hma laksaktu Health Minister leh Health Department hotute chungah lawmthu a sawi a. Aizawl East - I bial chhunga Zemabawk North ah kum 2010 tawp lama Health Clinic Centre a nih tawh thu leh tunhnaia Falkland Venga hawn mai tura peih fel tep a nih thu te sawiin Urban Health Centre emaw Maternity Centre emaw dah tura bawhzui mek a nih thu te a puang bawk. Health Department-in mipui te hriselna kawnga chak taka hma an lak thinna chu chhuanawm tiin Pu R.Lalrinawma chuan ram pum leh hmarchhak huapa an hnathawh that avanga lawmman an dawn te hetiang hian a tarlang bawk :-
1. Second Best Performing State in NRHM in the N.E.State.
2. Health Most Improved Small State 2011 awarded by India Today
3. Outstanding Improvement in Programme Implementation in RBSY in N.E.Region
4. JRD Tata Memorial Award for Population Reproductive Health and Family Planning Programme
5. AYUSH Best Performance in N.E.State
Tihdam aiin inven a tha zawk tih hre renga, taksa hriselna khawih pawi thei laka inthiarfihlim leh insum tura fuihin Pu R.Lalrinawma chuan Health Department leh thawktutea innghat mai lova mahni tih theih tawkah tan la theuh turin kalkhawmte chu a chah bawk a ni. Health Clinic Centre hawnna hi Sihphir Venghlun VCP Pu H.K.Lalhmunsiama’n a kaihruai a, Law Commission Chairman bakah CMO Dr Lalthantluanga pawhin thu sawiin VC Treasurer Pu C.Lalremruata’n report a pe bawk a ni.
