Chief Minister Pu Lal Thanhawla chuan India khua leh tui kan nih phawt chuan Hindi kan thiam tur a ni, a ti. He thu hi vawiina Grand National Hindi Day vawi 63-na hmanna, Vanapa Hall-a neiha a sawi a ni.

Chief Minister chuan kum 1949 vawiin angah hindi hi national languauge a puan alo ni tawh a ni a ti a. Chuvangin hindi hi India official languauge anih angin India rama kan awm chhung chuan a pawimawhna hi a zual zel dawn a ni a ti a. India rama tlangtlak tum tan chuan hindi hi thiam a tul a ni a ti.

Chief Minister chuan Mizote hi khawhawi zim leh thliarkar rilru pu thin kan nih avang hian midangte pawimawhna kan hai thin a, chuvangin hindi zir tum pawh kan awm ngai manglo a ni a ti a. Tawng hian inunauna min siam sak a, tawng hrang hrang kan thiam chuan kan ngaihtuahna leh khawhawite pawh a ti zau thin a ni a ti a. Khawvel inherdanglam zelah kan ngaidante alo zau ve ta zel a, tawng hrang hrang hriat leh thiam a pawimawhnate hre chho zelin, hindi phei chu a pawimawh bikna leh kan thiam hmasak ber tur zinga mi a ni tih kan hre chho zel a, a lawmawm hle a ni a ti a. Hindi tawnga eizawng kan awm chho ta zel leh doctorate degree thlenga thiamna nei kan awm ta te hi a lawmawm hle a ni a ti.

Tunhmaa firfiaka kal thin ten tihluihna a hindi tawng ram pumah hman tir an lo tum tawhna thin sawilangin, Chief Minister chuan saptawng hman thlenga khap an tum thin a ni a ti a. Tawng hi tihluihna a hman luih tir chi a nilo tiin, tunah chuan hindi pawimawhna kan hriat rualin saptawng pawimawhna pawh kan hre chho zel a ni a ti a. Hindi hi Mizoram ngeiah pawh uar taka kalpui a tul a ni tih chu sorkar pawhin a hria a, amaherawhchu sum harsatna avangin Hindi Directorate pawh kan din theilo a ni a ti. He sorkar hian hindi pawimawhna a hria a ni tiin, tun hma pawha Arjun Singha hnenah Mizorama hindi chawilar tura an lo ngen tawh thin thu a sawilang bawk a ni.

Chief Minister chuan Mizo ten thliarkar rilru kan paih angai a ni tiin, hindi chu kan uar sauh sauh a tulzia kan hriat chhoh zel a tul a ni a ti a.Hindi pawimawhna hi kan thinlungah a nung reng a, sum harsatna a vang zawkin duh angin a kalpui theih loh a ni a ti. National Hindi Day hmang thei a a buatsaihtu, Mizo Hindi Zirlai Pawl leh Rashtrabhasha Vidyarthi Sangh, Mizoram chungah lawmthu a sawi a ni.

Khaulzahawm Pu Lalsawta, Education Minister chuan hindi ngaihsak nachang hre ngailo te pawhin tunah chuan a pawimawhna an rawn hre chho ve ta zel a a lawmawm hle a ni a ti a. Tunhmain hindi hi tangkaipui tura zirlai ten an zir ngai loh thu sawiin, tunah chuan hindi tawng hi hawrawp pali, devenagiri, roman, saptawng leh Mizo hawrawp ten zirlai ten an zir tawh a ni a ti a. Hindi hi kan ram tan a pawimawh a, tun ai hian i uar zel ang u tiin mitin a sawm a ni.

National Hindi Day hmanna inkhawm kaihruaitu Dr,V.R.Ralte chuan tun tum Hindi Day hmanna hi Mizoram a vawi hnihna anih thu sawiin, kum 2001 khan Mizoram Governor hlui A.R.Kohli hovin an lo hmang tawh a ni a ti.