Aizawl Book Fair vawi 9-na chu Vanapa Hall-ah Home Minister Pu R.Lalzirliana’n vawiin chawhma dar 10:30 khan a hawng.
Social media thang zelin lehkhabu chhiarna hun tha a ei hek a, lehkhabu chhiar peihna a tihbo zel laia mite tana lehkhabu tha chhawp chhuah chu ram leh hnam hmangaihtu dik tak rilru a ni tiin, Home Minister chuan Aizawl Book Fair buatsaihtu Pi Maggie L. Ralte leh a thawhpuite hma lakna a fak a. An hna thawh chu chhunzawm zel turin a chah nghal bawk. Lehkhabu chhiar tam chu an fingin kawm an nuam a, an bula awm pawh a hahdamthlak thin tiin, khuallian chuan eng lehkhabu pawh, a chhuahtute’n chhuah tlaka an ngaih tawh chu a chhiar tlak vek a, thil tangkai puak chhuah tur a awm zel a ni, a ti a. Thluaka thil khawl khawm tawh chu misual leh rukru lakah pawh a himin, bo ve mai thei a ni lo va, chu vang chuan lehkhabu chhiar tam hi rohlu ber a ni, a ti.
Hawnna hun kaihruaitu Dr Lalbiakdiki Hnamte chuan lehkhabu chhiar tam chuan tar at an pumpelh thei tih a tak ngeia a lo tawn tawh thu a sawi a. Book Fair buatsaihtu Pi Maggie L. Ralte pawhin hlawkna lam um lo va, hnam hmangaihna rilru atanga chu thil chu buatsaih thin an nih thu a sawi bawk.
He Aizawl Book Fair vawi 9-na hi May ni 2-14, 2016 chhung hian Vanapa Hall-ah neih a ni dawn a. Zing dar 9 atanga tlai dar 6 thleng tlawh theih a ni ang. Naupang, zirlai, thalai leh upa lam te chena chhiar tur lehkhabu tangkai tak tak chhawp chhuah niin, a man pangngai aia zaa sawm (10%)-a tlawmin lei theih a ni.
He Book Fair denchhen hian Pi Maggie-i chuan a unaute, Dr John M. Ralte leh Dr James B. Ralte te hriat reng nan Kawnpui Branch YMA Library-a dah tur lehkhabu eng emaw zat a hlan bawk.
