Vawiin khan Village Council te tana Thiam Zirna Inpui District Panchayat Resource Centre (DPRC), Keifangtlang, Champhaia mi chu Rural Development Minister Pu R.Lalzirlianan a hawng. Minister-in a hawn zawh hnu hian hawnna pualin programme Auditorium, DPRC, Champhaiah hman chhunzawm a ni.

Pu R.Lalzirliana chuan Champhai District puala District Panchayat Resource Centre sak a nita chu lawmawm a tih thu leh a puitlin theihna tura tha thawhtu hrang hrangte inpekna chu fakawm a tih thu a sawi a. DPRC chu Mizoram sawrkar flagship programme NLUP kailawn siamtu pawimawh tak anih thu sawiin, a awm lohna District dangah te pawh hawn zel tuma hmalak anih thu a sawi a. DPRC chu hman raw tha tak tak a thuam anih bakah mikhual thlen theihna tur hmun a nih tel avangin Champhai khaw pawn lam a tanga lokalte tan pawha awlsamna a siam tur thu a sawi a. Khuallian chuan Zofate kan la inkhaichhuah rual loh avangin NLUP hnuaiah MLA Constituency tinah Beneficiary 400 theuh thlanchhuah an nih leh dawn thu a sawi a. Mizo, a ram neitu ngeite chu tumah inthliarna awm lo leh duh sak bik neilovin, a dawng tur dik takte hnenah NLUP in a tum ang ngeiin pek an nih tur thu a sawi a, chumi thlanchhuah kawngah khawtlang hruaitute leh thlangchhuaktute pawh dikna kengkawh turin a chah a. NLUP chu Mirethei leh chhumchhiate khaichhuahna atana siam anih ang ngeiin a dawngtu te pawhin pek an nih chhan hriaa, theihtawp an chhuah a ngaih thu a sawi a. Theihtawp chhuaha tan la an awm laia, titha duh lo te chu nakin lawk a mite hnuaia kun leh mai tur an ni, a ti a. Pu R.Lalzirlana chuan sawiselna haw mai lova, inzirna leh insiamthatna atana hmang thiam mi chu mifing an nih thu sawiin, chu chuan hmasawnna a thlen thin thu a sawi a. Kan nitin nunah Pipu nun zemawi leh Kristian nun dan tur dik tak kan chawinung thar leh angaih thu a sawi bawk a ni. DPRC Champhai chu anih dan tur ang taka hman anih theihna tur leh District mipuiten an hlawkpui theihna turin duhsakna a hlan a ni.

He hun hi SIRD&PR Director Pi Maria CT Zualiā€™n a kaihruaia. Pu C.Lalthlansanga, Core Faculty (RE), SIRD&PR in technical report a pe a. Pu Khawlsiamthanga Khawlhring, Sr Core Faculty (Eco) , SIRD&PR in lawmthu sawina neiin hun hi a khar a ni.

DPRC Champhai hi Ministry of Panchayat Raj sum cheng nuai 155.13 seng a sak niin, kum 2016, October Ni 1 a sak tan niin kumin February ni 8 khan sak zawh a ni. Sq Metre 685 a zau aawh a, a dung feet 125 leh a vang feet 90 a ni a. Chhawng hnih niin Establismnet room, Conference Hall changtlung tak, Library, Auditorium, Guest Room 15, mi 30 thleng thei tur te a awm bawk a ni. RCC Footing leh Frame vek niin, tui Litre 28000dah khawlna tha tawk tak a nei bawk a ni.

Vawiin DPRC hawnna hunah hian Sawrkar Department hotute, khawtlang hruaitute leh Vilage Council member training nei laite an tel tha hle a ni.

Attachment

  • Loading attachment...