Vawiin chawhma khan ATI Auditorium-ah World Vision India leh Mizoram State Child Protection Society tangkawp buatsaih naupang pawngsual/khuaikhem laka dona beihpui ‘It takes Mizoram To End Child Sexual Abuse’ campaign hawnna neih a ni a. Law & Judicial Minister Pu Lalsawta chu Khuallian a ni.

Khuallian Pu Lalsawta chuan naupang pawisawilo laka kut thlak, pawngsual leh khuaikhem hi tih tak zeta kan do a tul a ni tiin sawrkar department leh police lam ringawt ni lovin NGO leh mipuite nen kan thawhho a ngai a ni, a ti a. Naupangte himna atana tihtur chu kan hria a, mahse a thiltih ngai lam hi kan ti thin lo a ni, a ti a. World Vision ten khawvel hmun hrang hrangah hmalak a tul an tih vangin an thawk mek a, Mizoram an rawn luhchilh ta chu lawmawm a tih thu a sawi a. Naupang khuaikhem chungchangah  a tuartu chuan midang hriat a hlauh bakah chhungten kan zep pui a, sawi chhuah a ni lo thin a ni tiin anmahni khawihtute chu a ti ngampa zual thin a ni, a ti a.  Court-a kal ai chuan inngaihdam mai kan chingte hian naupang khuaikhem a tihluar a, mizo mipuiten naupang pawngsual tawk an tam sawt zia kan hriat tlan a ngai a ni, a ti.

World Vision Group Director Pu Sony Thomas chuan World Vision hian khawvel pum huapin naupang himna campaign a kalpui mek a, chhungkua, school, khawtlang leh hnathawhnaah  naupang ten pawngsual an tawk thin a ni tiin India ram chu naupang pawngsual hluar ber na zing ami a ni, a ti a. Report in a tarlan danin India rama naupang pawngsual tawktute zinga 94.5% chuan anmahni pawngsualtute an hria a ni, a ti a. Naupangte himna atana dan kan neihte tha taka kengkawh turin tan lak a ngai a ni, a ti a. Naupangte himna atana campaign hi India ram hmun hrang hrangah kalpui mek a ni, a ti. 

World Vision India hi 1951-a din niin Campaign hi state 25 leh UT 1 huamchhunga khawpui leh thingtlang khua 7000-ah naupang maktaduai 10 himna turin kalpui tum a ni. World Vision India hi tanpui ngaite tanpuitu leh naupangte himna kawnga thawktu a ni a. Campaign hi 2021 hmain ram pum huapa tuam chhuah tum a ni. Naupang khuaikhem that lohzia leh pawi theihzia hria a, an tana aw chhuah a nih theih nan World Vision chuan kil hrang hrang atangin campaign a kalpui a. Campaign tum zinga langsar tak chu sualna do kawnga mipui tih theih, hmachhawn dan tur te, hmalak dan tur te leh tuartute chhawmdawl dan tur te a ni a. Campaign-ah hian naupang himna atan pawl hrang hrang thawhho a ngaih zia sawi a ni a, hemi atan hian District Child Protection Unit mai bakah Block Level, Village Level Child Protection Committee tihchak a, an mawhphurhna leh an tihtheihawmte uar taka zirtirna kalpui a pawimawh thu tarlan a ni.

World Vision report in a tarlan dan chuan India ram puma naupang pawngsual tawk zat % hi kum 2014-2015 khan 67.5% niin kum 2015-2016 khan 82% a ni a. The Protection of Children from Sexual Offences (POCSO) case registered hi kum 2015 khan 10854 niin kum 2016 khan 36022 a ni. Mizoramah chuan naupang khawih/pawngsual/kutthlak vanga case neih zat hi kum 2014-178, 2015-186, 2016-188 a ni a, Child Welfare Committee (CWC) sexual abuse case kum 2015-2016 chhungin 111, 2016-2017 chhungin 116, 2017-2018 chhungin 164, April-June2018 chhungin 29 a awm a. Juvenile Justice Board (JJB) case kum 2015-2018 (June) thleng 106 a awm a ni.

Naupangte himna atana hmalakna hrang hrang a awm a. State Child Protection Society & State Adoption Resource Agency, District Child Protection Unit, Child Welfare Committee, Juvenile Justice Board, Special Juvenile Police Unit, State Child Protection & State Adoption Advisory Committee, State Level Inspection Committee, District Child Protection Committee, Home Management Committee, Children’s Committee, Jail Inspection Committee, District Level Inspection Committee, Block Level Child Protection Committee an awm a. School tam zawkah nodal teacher ruat an ni bawk.

World Vision Programme Monitoring Office Guwahati Associate Director Pu Samuel Therieh chuan kalkhawmte lawmna thu a sawi a. World Vision India Group Director Pu Sony Thomas chuan World Vision thawhdan tlangpui a tarlang a. Mizoram State Child Protection Society Programme Manager Pi Amy Lalrinpuii chuan ' Mizoram State Scenario on Child Protection Systems & Structure' tih thupui hmangin thu a sawi a. MZU Dept of Social Work, Sr. Assistant Prof Dr. Henry Zodinliana Pachuau chuan 'Sharing on challenges in implementations of programs & policies and plans/way-forward plans with special focus on child sexual abuse' tih thupui hmangin thu a sawi a. World Vision Campaign Officer Dr Anangradev Singh chuan ' Community based child protector mechanism with special focus on child sexual abuse'  presentation a pe a. Khuallian hian lehkhabu ‘My Body, My Safety’ tih a tlangzarh a. Mizoram State Commissioner for Protection of Child Rights Pi Sangzuali Vanchhawng hovin pledge sawiho a ni a. Social Welfare Director Pi Laldikkimi chuan lawmthu sawina in hun a khar a ni. DGP Pu Balaji Srivastava, District and Sessions Judge Pu Joel Joseph Denga, Special Public Prosector Pi K Lalremruati, Social Welfare hotute leh hnathawkte, World Vision India aiawhte, Chaltlang Higher Secondary School zirlaite leh Meisavaih Children's Club an tel a ni.