Vawiin chawhma khan UD&PA Minister Pu Zodintluanga chuan New Secretariat Complex huam chhungah sawrkar building thar pathum - Aizawl Convention Centre(ACC), Administrative Training Institute(ATI) Car Parking leh Multi-Level Car Parking (MLCP)sak hna  intanna turin construction site-ah  lung a  phum. 

Sawrkar building thar te  lung phum na hunah hian UD&PA Minister Pu Zodintluanga chuan building chi hrang pathum sak hna tan nan  a ruala  lung phumna   neih a ni chu thil lawmawm tak a ni a ti a." Mizoramin hma a sawn zel avangin central leh India ram pawn lam atang te thleng pawhin khual tha, mi pawimawh tak tak te leh official pawimawh tak tak tlawhtu kan nei chho zut a. Thlenna chungchangah  harsatna kan tawh mai bakah VVIP te, VIP leh mi pawimawh te an thuihruai te nen Aizawl khawpui kawngpui lun takah an inzui chang hian mipuiin harsatna tam tak kan tawk thin a. Sawrkar chuan mipui nawlpui khawsak phung ti buai lova kan khualtha te leh anmahni zuitute zawng zawng dawl zo thlenna tha leh official meeting neih theih nghal na tur hmun pakhat siam a duhna a rei tawh hle a. Chutiang ngaihtuahna atang chuan ACC leh New Secretariat MLCP te hi a lo piang a, sak zawh a nih hun chuan nasa takin kan tangkai pui dawn a ni", a ti. New Secretariat MLCP phei chu tunah hian mamawhna a san tawh thu sawiin Secretariat Staff leh dawrtu ten lirthei hunna  an in chan lo nasa tawh hle a ni a ti a. New Secretariat Building thar sak belh mek luah a nih phei chuan lirthei nasa zawka a pun belh dawn a vangin New Secretariat MLCP chu a tangkai hle dawn a ni a ti. 

Foundation stone-laying programme hi  Multi-Level Car Parking(MLCP) sakna tur hmunah neih niin Pu Vanlalmawia Joint  Secretary, UD&PA chuan a kaihruai a. He hunah hian  Pu J.Laldingliana, AE, UD&PA  hnen atangin technical report ngaihthlak a ni a, UD&PA Pu Joseph H. Lalramsanga'n lawmthu sawina neiin  programme hi khar a ni.

Technical Report a tarlan dan chuan Aizawl Convention Centre sakna sum Rs 2499.99Lakh hi Special Plan Assistance (SPA) scheme hnuai atanga hmuh a ni . He huilding hi chhawng 5 a ni a, Ground Floor-ah Lobby, Reception, Offices, Emergency Care Unit, Seminar Room - mi 150 thut lenna, Convention Centre Office, Restaurant, VIP Lounge, Rest Room, Coffee shop, Emporium, Information & Banking facilities, Public toilet, Communication Centre, Care taker's Quarters - 3 numbers  leh Open Parking  - Car 10 hun theihna, First Floor-ah Board Room Number  1 - mi 20 thut lenna, Board room Number 2 - Mi 80 thut lenna, Lecture Hall - mi 100 leng, Lounge, VIP lounge, Toilets leh Deluxe Rooms - 12 numbers, Second Floor-ah Auditorium Entrance Lobby, Food Stalls, Public Toilet, VIP Lounge leh Suite Room - 6 Numbers, Third Floor-ah Auditorium - mi 432 thut lenna, Lounge, VIP Lounge, Suite Rooms - 6 Numbers leh Basement Floor-ah Parking - car 22 din theihna, store room, Parking Duty office, Service Area leh Gymnasium te a awm dawn a ni.

ATI Car Parking sakna tur sum Rs 140 Lakh chu New Economic Development Policy(NEDP) atanga hmuh a ni a, UD&PA in  Departmental Works angin an thawk dawn  a, thla 12 chhunga sak zawh tura ruahman a ni. ATI Car Parking hi ATI Car parking hi chhawng 3 a ni a, Car 26, Two wheeler 30 leh Bus 2 a leng thei tura ruahman a ni.

New Secretariat  Multi Level  Car Parking sakna tur sum Rs 3601.00Lakha hi Non Lapsable Central  Pool of Resources(NLCPR), Ministry of DoNER  atanga hmuh a ni a, thla 24 chhunga sak zawh hman tura ruahman a ni.  New Secretariat MLCP hi chhawng 9 a sang a ni dawn a; car 351 leh two wheeler 224 a hun len theih tura beisei a ni a, a chhawng hnuai atanga chhawng chung te hi RCC Ramp( Cement Concrete kalkawng) in a vet chhuak vek dawn a, he buildingah hian Lirthei chhe siamna(workshop), Caretaker quarter, Motor silna, Food Court, servicing centre leh mipui mamawh thil dang te dah tum a ni bawk a ni.