No.3803/2020-2021

Tukin zing dar 7 atang khan Sports, Tourism leh ICT changtu Minister Pu Robert Romawia Royte chuan a bial chhung Chite, Chhinga Veng, Chhinga Vengthar leh Dawrpui tlawhin hmasawnna ruhrel dinthar hawn leh bul tan tur lungphum phumna hun te a hmang a. Mamit bialtu MLA Er.H.Lalzirliana, Aizawl Mayor Pu PC Lalhmingthanga leh Ex-MLA Pu TC Pachhunga ten Minister hi an tawiawm a ni.

Minister Pu Robert Romawia Royte, Aizawl East II bialtu MLA ni bawk chuan Chite Vengah Health Clinic Centre a hawng a. Chite Veng hian damloh ni khuaa pan mai tur Health Centre an la nei ngai lova. An veng mipui tana panna hnai veng danga Sub-Centre-te ringin kum tam tak an awm hnuah Health Centre an neih theih nan Health Minister Dr R.Lalthangliana leh bialtu MLA hmalaknain vawiin khan Health Clinic Centre hi hawn a ni ta a ni. Pu Robert Romawia chuan Chite Veng a lawmpui thu sawiin he veng mipuiten an mamawh ngawih ngawih, anmahni veng ngeiah Health Clinic hawn a ni ta chu veng mipuite hmingin sawrkar chungah lawmthu a sawi a. He clinic tana building thar sak dan tur hmunhmate pawh thlithlai mek a nih thu leh khawtlang hruaitute nen inrawn chunga sak thuai theih a beiseiawm thu a sawi bawk a ni.

Chhinga Veng, KVM High School-ah Sports Minister hian Basketball Court a hawng bawk a. He basketball court hi MLA LADS atangin cheng nuai 8 senga sak a ni a, Local Council-in a sak hna hi an thawk a ni. He court hi KVM School compound chhunga awm mah ni se, khawtlang tana chhawr tangkai theih tura ruahmanna siam a ni a. School ta bil tur ni lovin Chhinga Veng leh a chhehvel awm thalai, basketball-a tui ten tangkai taka an hman theih turin school thuneitute nen an inremsiam a ni.

Pu Robert Romawia Royte chuan Saron Veng kaltlanga Chhinga Vengthar leh Tuithiang inkalpawhna tur ‘Lalat Bridge’ tia a hming vuah, lei dawh hnathawh bultanna tur lungphum a phum a. Thu sawiin Minister chuan Chhinga Vengthar leh Saron inrina-ah kawr te pahnih kana sak ngai, hmun rual rem lo tak a nih thu leh helai inkalpawhna kawng siam hna thawh tumin ruahmanna siam lo nih tawh thin mahse kum tam tak chhung puitlin theih a ni lova, khawtlang mipuite tana kawng pawimawh tak a nih si avangin theihtawp chhuahin Chief Minister Pu Zoramthanga thahnemngaihna avangin lei dawh theih a ni dawn ta, tih a sawi a. Helai ram hi mimal ram a nih avangin ram neitu mi pathumin an ram te a thlawnin an pe a. Pu PC Lianhrima te chhungkua, Lalat Enterprise chuan an mimal ram zau tak a thlawna an thawh avangin lei hmingah pawh hian Lalat Bridge tia vuah a ni. Lei dawh nan leh kawng sial nan sawrkarin cheng nuai 200 a sanction a ni.

Vawiin chawhma vek khan Minister Pu Robert Romawia Royte chuan Dawrpui Multipurpose Centre-a programme tawi buatsaihah multilevel parking cum basketball court sakna tur lungphum a phum nghal a. He programme hi PWD Engineer-in-Chief Pu K.Lalsawmvela’n a kaihruai a ni. Kumin kum tawpa sak zawh hman tura beisei niin basketball court-ah hian a entu mipui 500 zet thutna a awm thei dawn a. A hnuaiah lirthei engemawzat lenna tur car parking 800.13 sqm a zau sak a ni dawn bawk a ni.