No.3804/2020-2021

Dated Serchhip, the 5th August, 2020: Vawiin chawhma dar 11:00 khan DC Conference Hall, Serchhip ah District chhung khaw hrang hranga Village Council Election atana Returning Officer leh Asst. Returning Officer turte tan Training buatsaih a ni a, Pu Kumar Abhishek, IAS, District Election Officer chuan he Training hi a hawng.

Pu Kumar Abhishek, District Election Officer chuan training hawnna thutawi sawiin VC Election fel fai kan neih theih nan Returning Officer leh Asst. Returning Officer te tha taka inbuatsaih a tul thu leh an mawhphurhna tha taka an hlen a pawimawh thu a sawi a. Chutianga an mawhphurhna te an hlen theih nana puih an ngaihna apiangah District Election Officer leh a thawhpuite an inpeih reng thu hrilhin, ’The Mizoram Village Council Rules 2014’ hnuaiah VC Election thianghlim leh felfai taka kalpui anih theih nan duhsakna a hlan a ni.

Pu Vanlalhmachuana, Election Officer chuan tun VC inthlan lo awm tur atana a fawng chelhtu tur Returning Officer leh Asst, Returning Officer te kan inko khawm hmasa ber a. Inthlanna fel leh dik buatsaih tura district chhunga a tha ber ber nia hriatte thlan an nih thu sawiin, an chungah rinna an nghah tih a hrilh a. Sawisel bova inthlanna an buatsaih theuh theih nan training chu uluk taka kal theuh turin a chah a ni.

He Trainingah hian Master Trainer 3 ten zirtirna an pe a, Pi Dorothy Muansangi, SDO (C), N. Vanlaiphai chuan inthlan laia RO te mawhphurhna leh vote chhiar dan tur chungchang a zirtir a. Pi F. Lalnisai, SDC Serchhip chuan inthlan nomination file dan tur te, nomination file endik dan turte leh symbol thlan dan te, candidate turte tih fel leh candidate tur list buatsaih dan chungchangte a zirtir a. Pu Vanlalhmachhuana, Election Officer pawhin RO leh ARO te hriattur leh mawhphurhna hrang hrangte a zirtir bawk a ni.

Serchhip District ah hian Village Council 54 a awm a, he inthlanna atan hian Returning Officer 55 leh Asst. Returning Officer 5 ruat niin vawiina training ah hian an tel kim vek a ni.

Attachment

  • Loading attachment...