No.2989/2021-2022
Aizawl 13th November, 2021 : Vawiin khan Pu Robert Romawia Royte, Minister, Sports & Youth Services, Tourism, Information & Communication Technology Department chuan Mamit District chhunga khaw thenkhat Kawrthah, Tuidam, Bawngva leh Mamit khuate tlawhin Sports Infrastructure hnathawh mekte a hmunah kalin a endik.

Minister hian Kawrthah leh Mamit-a Residential Sports School (RSS), 32 crore senga Edufice Infraservices Pvt. Ltd, New Delhi -te sak mek chu a tlawh a. Heng RSS Main Component chu Academic School Building, Boys Hostel, Girls Hostels, Staff Quarter, Principal Quarter, Multipurpose Hall, Guard House, Basketball Court, Volleyball Court bakah School compound fencing te a ni. Building sak hna hi Kum 2023 a zawh hman tura ruahman a ni. Hei bakah hian Kawrthah Volleyball Court tihchangtlun nan Minister hian 30 lakhs pek an nih tur thu a sawi bawk.

Tuidam khua-a Laldenga Football Ground, Rs 532.50 lakh senga siam hna thawh mek chu Minister hian a tlawh nghal a. Tuidam Volleyball Court siam nan 30 lakhs pek an nih tur thu a sawi bakah Hachhek tlangdung High School zirlaite tan Smart Classroom siam tan thuai a nih tur thu a sawi bawk a ni.

Sports Minister hian Bawngva khua tlawhin khawtlang hruaitute nen Mamit District sports complex hnuaia Athletic Ground Bawngva Field a siam tum chungchangah inkawmhona neih a ni a. Athletic Ground siamna bul vela chenna in 18 awm mekte chu VC te'n Bawngva Area hmun danga sawn dan tur lo ngaihtuah se tih a ni a. An in leh lo hlut zawng lo zirchiang a, assessment siam turin SDO (Sadar), Mamit chu tih a ni bawk.

Sports Minister hian Mamit-a Multipurpose Indoor Hall, Rs.1208 lakhs senga sak mek te, Mamit District Sports Complex hnuaia Futsal Ground, Basketball Court, Volleyball Court leh Tennis Court tura ruahmante bakah Mamit Tourist Lodge a tlawh nghal bawk a ni.

Vawiina Sports Infrastructure hna kal mek a tlawhna-ah hian a hmunah Contractor leh hnathawktute'n lo dawngsawngin an hnathawh duhkhawp loh laite siam tha leh tura a hrilh bakah an hnathawhte chu a hun taka zo fel thei turin Sports Minister hian a chah bakah a khaw tlawh hrang hrangah hian thalaite hman turin Football leh Volleyball a pe vek bawk a ni.

Minister Pu Robert Romawia Royte hi Pu John Tanpuia, Secretary, MSSC, Pu Saitluanga, Jt. Director, Tourism Department, Pu Vanlalrova, Director, Sports & Youth Services Department, Pu PC. Lalngaizuala, DEO Mamit, Pu James Lalrinchhana, Asst. Engineer, MSSC, SDO (Sadar) Mamit, SDO (Civil) Kawrthah bakah Officials dangte'n an tawiawm a ni.



Attachment

  • Loading attachment...