No.2988/2021-2022

Aizawl 13th November 2021: Vawiin khan Lunglei S bialtu MLA leh Bamboo Development Board Vice Chairman ni bawk Dr K Pachhunga chuan a bial chhung Lungrang S khuaa Middle School leh High School Building sak thar te a hawng. Heng school building thar te hi NABARD kaltlanga cheng nuai 26.20 senga ruahman an ni.

Hawnna program Pu Lalmawizuala, VCP Lungrang S kaihhruaiah Dr K Pachhunga chuan Lungrang S khua miten an mamawh em em school building thar tha tak hawn a ni  chu lawmawm tiin he hmalakna ti hlawhtling tura tan la tu khawtlang hruaitute leh Lungrang S khaw mipui te chungah lawmthu a sawi a. School building thar buatsaih chuan zirlaite nunah nghawng tha tak neia rah tha tak a chhuah ngei a beisei thu sawiin Lungrang S mipuite chu neitu rilru pu chunga duat taka lo enkawl chhunzawm turin a chah a. Zirna leh eizawnna kawngah zirlaite chu hmathlir thui tak nei tur leh thahnemngai taka inpuahchah chho turin a chah a. Covid-19 hrileng avangin hmasawnna hna thar tam thei rihlo mah se Lunglei S bial chhung khuate ti hmasawn turin sawrkar laipui leh Mizoram sawrkarah project hrang hrang buaipui mek niin mipui mamawh ruhrel te ruahman sak zel a tum thu a sawi a ni.

Hawnna program ah hian Tlabung SDO(C) Pu H. Zonunmawia leh Lunglei DIPRO Pi C.Lalremruati ten thu sawiin Pu C. Vanlalhruaia, Headmaster Lungrang S High School chuan report a pe a ni. Pu J Sanghnuna, member, Organizing Board chuan lawmthu sawina hun a hmang a ni. 


Attachment

  • Loading attachment...