154/2023-2024 

Aizawl, 19th April 2023 : Vawiin khan Tourism Minister Pu Robert Romawia Royte chuan a office chamber-ah Pu Lalhmachhuana Zofa lehkhabu ziah, ‘Mizo History Khua’ chu a tlangzarh.

He hunah hian Pu Robert Romawia Royte chuan  thusawiin, hmun hrang hranga awm Mizo hnahthlakte tipumkhattu leh zaikhata luantirtu chu thu leh hla hi a ni, a ti a. Hnam inpumkhatna kawnga hmanraw pawimawh tak tur leh thangthar zelte tana research-a innghahna tlak lehkhabu rotling tlangzarh a ni ta chu lawmawm a tih thu a sawi bawk.

Tourism Minister hian thalaite leh thangtharte chu lehkha chhiara tan la thar turin a fuih a. Lehkha chhiar pawimawhna, hlutna leh tangkaina hre thar tur leh hemi kawnga ram changkangte hnungzui turin a chah nghal bawk a ni. Smartphone hmanga thu hriat tam tak ten belhchian an dawl loh thu sawi bawkin Minister chuan lehkhabu chhiar atanga hriatna  leh bengvarna te erawh chuan belhchian an dawl bik a ni, a ti.

Lehkhabu tlangzarh inkhawm hi MJA President Pu C.Lalrambuatsaiha'n a kaihruai a, Rev. R.Laldika'n hun serh hmangin book preview Pu Michael Lalthanmawia, Chairman, ZORO History Committee-in a nei a ni. Pu Lalhmachhuana Zofa hian lehkhabu chi hrang hrang 157 zet a lo chhuah tawh a, lehkhabu ziah chhuah leh mai tur 14 lai a nei bawk. Lehkhabu tlangzarh tak, Mizo History KHUA tih chu phek 735-a chhah niin Bu khat Rs 1,000/- man a ni.