2440/2022-2023
Dated Hnahthial, the 26th October, 2022: Nizan khan Pu Robert Romawia Royte, Minister, Tourism, Sports & Youth Services, ICT, etc leh Mizo Cultural Organisation President ni bawk chuan Hnahthial Electric Veng Community Hall ah Mizo Cultural Organisation (MCO) Sub-Headquarters Hnahthial a hawng.

A hawnna thusawiin Minister chuan, Hnahthial khawpuia Mizo Cultural Organisation Sub Headquarters hawn theih a ni ta chu lawmawm a tih thu a sawi a. Hun engemawti atang tawha hawn tum kan ni tawh a, zaninah a takin kan tihlawhtling thei ta a ni, a ti. MCO hi Society Registration nei, thiltum leh inkaihhruaina fel tak neia ding kan ni a. Tunlai khawvelah mahni hnam nunphung, zia leh chin dan vawnhim leh chawisan a tul hle a, tuna thil thleng hi khawvel lehlama mite pawhin min hmuhpui nghal theih tawh avangin kan hnamzia leh nunphung chawikanna leh thehdarhna remchang pawh kan nei tha tawh hle a ni. Hnam nun leh zia chawisan leh venhim thuah YMA te, MHIP te, MUP leh pawl dang kan nei tih kan hriaa, anni hmalakna leh MCO hmalakna hi thil kal dun tur, inpuitawn zela kalpui tur a ni a, kan tlawmngaipawl neihsa te hmalakna duhkhawp lohna a ni hran lo a ni, a ti. Tourism Department te nena tangkawpin tunhnaiah pawh MCO te hian Foreign ah hnam lam leh zai phochhuahna an neih thute tarlangin, hetiang lam hmalakna hi neih zel pawh kan tum dawn a ni, a ti.

A hawnna inkhawm hi Pu H. Hmingthanzuala, President, MCO, Hnahthial Sub- Headquarters in a kaihruai a, Pu Lallawmzuala, Secretary chuan report a pe a ni.

He hunah hian zaithiamten hun an hman bakah MCO Hnahthial Cultural Troupe ten Mizo hnam lam chi hrang hrang an entir a ni. Pu T. Lalramliana, Sr. Vice President in lawmthu sawiin inkhawm a khar a ni.