1199/2023-2024

Mamit 20th July, 2023 : Pu Robert Romawia Royte, Hon'ble Minister of State, Sports & Youth Services, Tourism, Information & Communication Technology leh District Council & Minority Affairs Department changtu chuan vawiin Chuhvel khua-ah Volleyball Court khuallian niin a hawng.

Khuallian Sports Minister chuan International Standard Volleyball Court Chuhvel khua-a hawn theih a ni chu lawmawm a tih thu a sawi a. Tangkai taka thalaite'n an hman a, infiamna lama an hlawkpui ngei a beisei thu sawiin Volleyball Court chu rilru leh taksa hriselna thlentu ni ngei se a duh thu a sawi. Kum 2019 hmalamah kha chuan hetiang International Standard Size Volleyball Court hi a tam lo hle a, Chuhvel khuain a hmasa pawla an nei chu a lawmpui takzet thu a  sawi bawk. Chuhvel khaw zauhna hmunah Electric Current a lut lo chu a ranglama ngaihtuahpui an nih tur thu sawiin Volleyball Court awmna Approach Road pawh siam a nih theih nan hmalakpui a tum thu a sawi bawk.

Khuallian chuan Bairabi - Zamuang road cheng Nuai 3100 hmanga siam that tum mek a nih thu sawiin Zamuang leh Kolalian road pawh a siamna tur atan Nuai 500 sanction niin siam thuai a ni dawn a. Thinghlun panna kawng atan Nuai 900 leh Belkhai kawng atan Nuai 375 sanction awm tawhin siam thuai anih dawn bakah West Mualthuam atanga Sotapa inkar kawng siamna atan Nuai 200 ruahman mek a ni a ti bawk.

Minister chuan Kuhva hralhna chungchanga harsatna awm thin chu pawi a tih thu sawiin dan lova Myanmar atanga Kuhva lo lut chu nasa lehzuala Check turin Sorkarin hma a la mek a ni a ti bawk.

Dr. C. Lalsangzuala, Chairman, Mizoram State Commission for Protection of Child Rights chuan thu a sawi bawk.

Pu James Lalramnghaka, AE, MSSC chuan Technical Report pein vawiina hawn tak Volleyball Court hi Kum 2020-2021 Pradhan Mantri Jan Vikas Kaaryakram (PMJVK) Scheme atanga siam niin Rs. 31.20 lakh approval hmuh a ni a. Project cost atanga 90% Rs. 28.08 lakh hi Central tum niin 10% Rs. 3.12 lakh hi State Sawrkar tum a ni. 18th July, 2022 atanga hnathawh tan niin 5th July, 2023 ah zawhfel a ni a. M/s Junior Consultancy Services te'n he hna hi an thawk a ni. Volleyball Court hian Gallery, Vantlang Zun In, Fencing leh Light System te a keng tel a ni.

Minister hian Chuhvel thalaite hnenah Volleyball leh Net a hlan bawk a ni.

Volleyball Court hawnna hun hi Pu H. Vanhmingthanga VCP Chuhvel chuan a kaihruai a. Pi Helen Lalremruati, V/C Member Chuhvel chuan lawmthu a sawi.

Minister hi Chairman, ZOFISHFED, Zawlnuam, Jt. Director, Sports & Youth Services Department, JE, MTDA, Tourism Department bakah Officials dangte'n an tawiawm a ni.