1565/2023-2024

Aizawl 18th August, 2023 : Pu Robert Romawia Royte, Minister of State, Sports & Youth Services, Tourism, Information & Communication Technology leh District Council & Minority Affairs Department changtu chuan vawiin khan Khamrang-ah Development of Village Based Eco Tourism siamna tur chu khuallian niin lungphum a phum. He hunah hian Pu K. Laldawngliana, MLA, Vice Chairman, Commerce & Industrial Development Board leh Pu TC Pachhunga, Vice Chairman, Tourism Development Board, Mizoram te chu khualzahawm an ni.

Community Hall, Khamrang-ah khuallian Tourism Minister chuan thu sawiin Mizoramin Responsible Tourist Policy a neih hnuah Khamrang khua-a Village Based Eco Tourism siamna tur lungphum a phum thei chu a lawmawm takzet a. India rampum huapa Tourism lama Mizoram kan lan ve theihna a nih ngei a beisei thu a sawi. Sawrkarin tih tur hmachhawp a neihte leh tih tur a tih te chu kan CM kaihhruaina hnuaiah chak taka tihpuitlin zel a ni a, Khamrang khua pawhin a hlawhtlinna an chang thei chu lawmawm a tiin duhsakna a hlan.

Mizo kan nihna, kan Culture, kan sakhuana te humhim chungin Tourism chu kalpui zel a ni dawn a. Kan ram leh hnam Tourism kaltlangin kan pho chhuak zel dawn a ni a ti. Responsible Tourism leh Village Based Eco Tourism thil tum chu Project awmna khua khaw mipuite'n a hlawkna lo hlawkpui tura din a nih angin Khamrang khua chu a hmasa ber an nih angin a hlawhtlin nana theihtawpchhuah turin a chah bawk.

Khualzahawm Pu K. Laldawngliana, Bialtu MLA chuan Reiek, Hmuifang, Thenzawl dawtah tunah Khamrang khuaah khualzinte hmunpui ni tura Sawrkarin Project lian a siam chu a lawmawm takzet a ni tiin a bial chhungah thalaite tan infiamna khelmual hrang hrang hawn an nih mai bakah siam belh mek zel a ni chu vannei an intih hle thu a sawi.

He huna Khualzahawm tho Pu TC Pachhunga chuan Tourism hmasawnna tur atana Khamrang khua-a cheng Nuai 800 senna tur project Tourism Minister-in a siam thei chu a lawmawm takzet a ni tiin Mizoram-in Tourism lama hma kan sawn zelna tur atana hmahruaitu anih ngei a beisei thu a sawi a. Khamrang mipuite chu Tourist dawnsawn dan thiam tur leh thianghlimna lama tan la zel tura chahin nungcha, thing leh mau humhalhna kawngah pawh tan la sauh sauh turin a chah bawk.

Pu V Lalengmawia, Jt. Secretary, Tourism Department chuan Technical Report pein Khamrang-a Tourism tihhmasawnna tur sum hi Ministry of Development of North Eastern Region (DoNER) hnuaia North East Special Infrastructure Development Scheme (NESIDS) atangin Nuai 800 hmuh a ni a. Mizorama Responsible Tourism flagship project hmasa ber siam tum niin kum 2 chhunga zawh fel tura ruahman a ni a. Hmalakna-ah hian component hrang hrang - Khamrang Village, Khamrang puk, Lungkulh, Bak Luk Trekking, Lungkhawthlir, Thangruma hmun te awlsam leh nuam zawka an tlawh theih nana siam tum a ni a ti. Pu Saitluanga, Director, Tourism Department chuan Mizoram Tourism chungchang Presentation neiin Tourism Department hi Ni 24.4.1987 atangin Officers leh Staff 34 te nen mahni-a inrelbawl ve tura tih a ni a. Ni 27.9.1987-ah Chanmari, Aizawl-ah mi inluahin Jt. Director kaihhruaina hnuaiah Department pangngai angin bul tan a ni a. Department pangngai anga a function tan lai hian Tourist Lodge 3, Saitual, Chaltlang leh Kolasib Tourist Lodge te a enkawl a ni. Kum 28 hnuah mahni pualin Directorate Building, MINECO Khatla-ah Office a nei ve tan a ni.

He hunah hian Dr. Lalrozama, IAS, Secretary, Tourism Department chuan kalkhawmte lawmna thu sawiin Responsible Tourism Pledge sawirualna hun hman a ni a. Pu Robert Lalramchuana, Chairman, Tourism Promotion Committee chuan kalkhawmte hnena lawmthu sawina a nei bawk. Minister hian Khamrang Football Club te Jersey a tlangzarh nghal bawk a ni.