1566/2023-2024

Lunglei the 18th, August' 2023: Vawiin khan Mizo Students' Union Regional Headquarters, Lunglei buatsaihin Saikuti Hall-ah Lunglei District atanga zirlai titha (Under Graduate Rank Holder) te lawmpuina hun hman a ni. He hunah hian Agriculture Minister Pu C. Lalrinsanga chu khuallian niin; Vice Chairman HPC, Lunglei Pu Lawmawma Tochhong chu khualzahawm a ni a. Pu Samuel Zoramthanpuia , President, MSU General Headquarter pawh Uaptu niin hun an hmanpui. Vawiin lawmpuina hun hi Pu C. Lalthlamuansanga, Treasurer, MSU, Regional Hqrs, Lunglei chuan a kaihruai a ni.

Khuallian Pu C. Lalrinsanga chuan Lunglei District atanga zirlai titha lawmpui tur an awm hi lawmawm a tih thu sawiin, hlawhtlinna tlang lawn theihna tura lawmpuina dawng an ni tih an hriat a ngaih thu a sawi a. Academic ringawt hi ram dinchhuahna a nilo a, Pathian zawnchhuah ni si a, tun thlenga hmasawnna tak tak kan neih theihlohna chu Pathian thu kan awih tawk loh vang a ni. Nationalism kan tih hian rinawmna leh taimakna a keng tel tih kan hriat a tul a. Kan ram a kan tih ve theih reng kan tihloh avangin ram dangah sum tam tak kan pe chhuak a, hetiang anih laia sawrkar hna ringawt thawh kan tum te hi kanin enfiah a hun a, ramin a mamawh leh mahni a kan intohdelhna tur kawng zawh nachang kan hriat a ngai a ni; a ti . Pu C. Lalrinsanga chuan sawrkar hnaruak tam tak awm mahse sawrkar hna lak zung zung theih anih loh dan te pawh kan hriat a ngai a ni. Hnam changkang kan tih te hi sawrkar hna aia mahni kutkawih hmanga eizawnna uar hnam an nih vang a ni a, chutianga mahni a eizawnna kawng dap kawngah rilru zau tak put a ngaih thu sawiin; zirlai te chuan kan zirnaah thiamna tak tak nei tur leh zirna in a ken tel mahni inthununna hi hmalam hun lo awm zel turah min kaihruaitu atan a pawimawh em em a ni tih i hre reng ang u; a ti bawk.

He hunah hian Vice Chairman HPC, Lunglei Pu Lawmawma Tochhong pawh in thusawiin; tunhma in zirlai titha lawmpuina hlan tur kan nei manglo thin a, tun hnai atang khan hlawhtlinna chang hmuh tur an awm zel hi lawmawm a tih thu a sawi a. Graduate thar te chu hlawhtlinna rahbi zawh tur kawng thui tak an la nei a ni tih hre reng a, mi tangkai leh chhawrtlak ni turin tun aia nasa a zirna lamah tan an lak a pawimawh thu sawiin; an kal zelna turah ngaihtuahna fim tak hmanga Pathian rawn chunga thutlukna an siam chuan , an tihsual loh tur thu a hrilh hlawm. Tun dinhmun hruai thlengtu an nu leh pa leh unau te theihnghilh ngai lo turin a ngen bawk. Pu Lawmawma Tochhong chuan Mizo nula leh tlangval an ni tih inhrereng a, zir sang ringawt ni lova, zir thiam, hmantlak leh chhawrtlak ni bawk turin a fuih a ni.

He hunah hian Uaptu Pu Samuel Zoramthanpuia, President, MSU Geeral Hqrs leh Pu Lallianpuia, President, MSU Regional Hqrs, Lunglei te pawhin thusawina hun an hmang.

Vawiina Under Graduate Rank Holder lawmpuina thilpek an pek  te hi an vaiin mi 37 an ni a, Higher and Technical Institute of Mizoram  (HATIM) atangin 8 , Pachhunga University College atangin 9, Lunglei Govt. College atangin 8, Govt. Hrangbana College atangin 3, Govt. J. Buana College atangin 1 leh Faith College atangin 1 te an ni. Heng bakah hian  Post Graduate a pass tha 5, B.ED 2 te hnenah lawmpuina Citation hlan an ni bawk.  Zirlai titha chawimawina bakah hian Mizoram State Teacher's Award 2023 lawmman dawngtu Pu F. Lalhmangaihthanga, Head Master Govt.High School Lunglei leh Mizo Students Union Regional Headquarter, Lunglei  hruaitu nilai zinga pass tha   mi 2 te leh Kum 2021-2023 chhunga hruaitu lo ni tawh pahnih te hnenah lawmpuina hi hlan an ni bawk. Vawiin a chawimawina an pek zawng zawngte hi an vawiin mi 42 an ni.