Nimin khan PHE, Industries leh Tourism changtu Minister Pu S. Hiato chuan zin chhuakin Sesawng Water Supply Scheme leh Chalfilh tlanga Tourist Resort sak laite a en fiah a. Pu S. Hiato hi Parliamentary Secretary Pu Chawngtinthanga, Chalfilh Constituency bialtu MLA bakah PHE, P&E, Tourism leh I&PR officer ten an tawiawm a ni.

Rs. Nuai 256 man Sesawng Water Supply Scheme atan hian Tuirini kaltlangin 25 Km a hla Chalfilh tlang atangin tui lak a ni a. Pump hmang lovin gravity-a lak niin a tirah chuan Tuirini aia 900 metre a sang ami lak a ni a, tui hna a that avang leh a insan hleihna a tam avangin pipe a puak zel a. He scheme atana sum awmsa te hman zawha a hlawhchham mai hlauin PHE Minister hmalakna avang hian tui hna hmun hniam zawk ami laka thar thawh leh a ni a, tunah hian 750 metre a sang, Lailak khaw daia Rangi lui atangin hlawhtling taka lak a ni ta a ni. Pu S. Hiato chuan Sesawng khawtlang hruaitute kawmin sorkar chu mipuite harsatna sukiang tura din a ni a ti a. Tuna Sesawng khuaa tui lakin a la thlen ve loh vengte tana tanky leh reservoir siam belh bakah tui lakna pipe lian dawlna RCC-a siam dan turte ngaihtuaha hma lak mek a ni a ti bawk.

Hemi hnu hian Pu S. Hiato hian Chalfilh tlanga Tourist Resort sak mek chu a en a. He resort sak hna hi PWD hnuaiah awmin tunah hian contractor ten a building hi an sa zo tawh a. Minister hovin PHE, P&E, PWD leh Tourism department hotuten electric hrui thlun dan tur leh tui pek dan tur te, ruah tui khawlna tuizem lian siam dan turte an sawi ho a ni. Chalfilh Tourist Resort-ah hian building 3 leh quarters 2 a awm a, April 2008 atang khan sak tan niin a vaia sakna atan hian Rs. Nuai 499 ruahman a ni a. Kumin krismas hma ngei hian hawn hman tumin hma lak mek a ni.

Pu S. Hiato chuan Mizoram hi tourist te tana hmuh chakawm a nihna tur chuan kan ram leilungte a nihna ang taka lantir a pawimawh tih a sawi a, foreign leh India ram hmun dang atanga Mizoram rawn tlawh thintute hian kan hnam zia rang leh kan khawsak phung dik tak hi hmuh an duh a ni a ti. Mizoram hmun hrang hrang eng emaw zatah Tourist Lodge hawng thar tura hma lak mek a ni tih sawiin Chalfilh Tourist Resort chu khawpui nunphung buai nuai nuai tlan bosana chawlh hahdam tha a nih bakah, thalaite tan hawi thawvenna hmun remchang tak a ni tiin a sawi a ni.