Vawiin khan Pu S.Laldingliana, Parliamentary Secretary chuan Lunglei Bazar veng mipuiten Health Sub-Centre atana an hman lailawk tur building a hawng.

Pu S. Laldingliana chuan thawktute fuihna thu sawiin \"Keimahni hma zawn theuh ah theihtawp chhuah chhunzawm ila, naupai enkawlna kawngah te, nau neih leh vaccine pek kawngah te an zavaiin tan la thar in Health Sub-Centre pawimawhna te puangzara mipuite hrilh hretu nih i tum zel ang u\" a ti a. Lunglei Bazar Veng ten Health Sub-Centre sakna tur hmunhma tha tak a neih chu a rang thei ang bera bawhzui a, tihpuitlin thuai a nih tur thu a tarlang tel bawk a ni.

Parliamentary Secretary chuan Health Department kalphung leh pawimawhna hrang hrangte a tarlang a. 13th Finance Commission atanga sum lo lut Rs. vaibelchhe sawmthum (30) pawh Health Sub Centre leh Primary Health Centre thuam thatna atana hman a nih dante sawiin Infant/Maternal Mortality Rate tih hniamna kawnga tan lak nasat a ngaih thu a sawi bawk.

Hawnna inkhawm hi Pu Zairemthanga, President, YMA bazar veng Branch in a kaihruai a, he hunah hian Pu VL Nghaksanga, VCP Bazar veng, Dr. Lalremmawii SMO leh Pu V.Vanthuama, Health Supervisor ten thu an sawi bawk.