Art & Culture Minister Pu PC Zoram Sangliana’n mahni hnam rohlu leh hnam zia chawisan nachang hria apiang an dingchhuak a, mahni hnamzia zahpui leh theihnghilh erawh chu hnam boral mek zia a ni, a ti.

He thu hi vawiina I&PR Auditorium-a Pu R. Chaldailova ziak ‘Mizo Pi Pute Khawvel’ lehkhabu a tlangzarhna a a sawi a ni. Art & Culture Minister chuan khawvel hmuhah Mizo hnam nunmawi phochhuah hi kan tihtur a ni tiin mahni awmna leh dinhmun theuhah rinawm zir tur leh pi pu te nunmawi chhawi nung zel turin kalkhawm te a chah a. Mizo pi pute chanchin ziahna lehkhabu tha tak, Mizo te chanchin leh pi pu te khawvelah ani aia rawn tur chuang awmlo Pu R. Chaldailova’n a buatsaih chu lawmawm a tih thu leh kan pi pute chin dan tha chhawm nung zel tura puitu tangkai tak a nih ngei a beisei thu a sawi bawk.

Lehkhabu tlangzarh inkhawm hi Pu VLC Vanlalhriatrenga’n a kaihruai a, a bu chhung thlirlawkna hun Pu Lalhmingmawia Ralte, Republic Hr. Sec. School zirtirtu chuan a hmang.