Vawiin chawhma dar 11:00 khan Parliamentary Secretary S.Laldingliana chuan a Bial chhung, Theiriat a mual an laih mek chu a hmunah a tlawh a, hmalak mek dan te a enfiah. Pu Dinga hian Theiriat mual laih mek chu za a 70 an zo tawh tih sawiin, a dunglam phei chu laih zawh tawh a nih thu a sawi a. Tunah hian a dung metres 110 leh a vang lam metres 70 ni turin ruahmanna kalpui mek a ni a ti.  UD&PA  atanga saving an neih Rs Nuai 44 hmangin retaining wall siam tum a nih thu Pu Dinga chuan a sawi a, leivung a tlakbelh hma in hna an tan thuai ang a ti bawk. 

Theiriat mual chhaklam, tuna Tower din mekna bulah chuan Lunglei Recreation Centre siam tum a nih thu Pu Dinga chuan sawiin, hemi atan hian Rs Nuai 300 chuang senna turin DPR pawh peihfel tawh a ni a ti a. Hei hi a hmin mai turah chuan kan ngai tih amah tawiawmtu media te a hrilh a ni. Theiriat tlang a Lunglei recreation siam tur hi picnic spot hmun nuam leh changkang taka ruahman a nih thu sawiin Pu Dinga chuan, thil hlui vawnthatna hmunah siam a ni anga, thalai te lawiluh nan leh in tihhlim nan bakah, chhungkua leh kohhran pawl hrang hrang tepawh in fellowship  leh hun hlimawm tak an hman theih nan ruahman tum a ni a ti. A sawi zelna ah Pu Dinga chuan khawthlir na tur, view tower pawh hmun hnih hmun thum-ah siam tum a ni a, helai hmun atang hian thlasik laiin khawthlang tuipui a Bangladesh tuikhuah Kaptai a lan theih dawn avangin, chumi thlirna hmun te chu siam a ni ang a ti bawk. Hei hi Theiriat tan mai nilovin, Lunglei khawpui chhunga thalai te tan a nih thu sawiin, thalai te hmakhua thlir in project lian tak an siam thu a tarlang a ni. Pu Dinga hian Theiriat mual a tlawh hnu hian Luangmual a Indoor Stadium an sak mek chu a tlawh bawk a, he Indoor Stadium hi 20% vel chu an zo tawh bawk a ni.