Vawiin dar 11:00am khan Mizoram Education Inspecting Officers Association (MEIOA) meeting chu School Education Directorate Conference Hall-ah Education Minister Pu Lalsawta hovin neih a ni a. He meeting ah hian School Education hmalakna hrang hrang thlirho niin District tina DEO leh SDEO ten an mahni bial theuh dinhmun report an pe bawk a ni.
He meeting hi Pu P. Lalchhuanga, IAS, Director of School Education in a kaihruai a, power point hmangin School Education hmalakna leh hmasawnna presentation neiin, School Education Minister Pu Lalsawta’n School Education tana hma a lakna leh zirna tih hmasawnna atana Sorkar hmalakna hrang hrang a tarlang bawk a ni.
He meeting ah hian Pu V. Ruatsanga, Deputy Director (Administration) leh Pu Sangliana, Deputy Director (Accounts) ten Department inrelbawlna leh Budget chungchang inhriat thar tirna hun hmangin, thusawina an nei bawk.
Minister Pu Lalsawta chuan thusawiin, Mizoram School Education kalphung thar tur hmalakna leh hmasawnna tarlangin Mizoram School Education Service (MES) siam tura Sawrkarin hma chak taka lak mek anih thu sawiin, MES hi thangtharte tana service thlantlak, tha leh chhenfakawm taka siam tum mek a nih thu a sawi a, hun rei lote ah tih hlawhtlin a nih thuai a beisei thu a sawi. School Education a Officer te tha ti chak turin Sawrkar a inpeih renga, chumi atan chuan hma lak mek a ni. School Education Officer te pheikhai rual taka thawk ho turin a chah bawk a. Mahni bial chhung theuh a harsatna awmte siamtha tura hma chak taka la thin turin a chah bawk. Department inrelbawlna (restructuring) tha zawk siam tuma hma la mek a ni tih a sawi bawk a. World Class Education sawi hi a inthlahrunawm lova, uar zawka sawi leh kalpui thei turin Officer kalkhawm te a chah a, World Class Education chuan thiamna tluantling, thiamna hmantlak leh tawng hmang thiamna neih a ni zawk tih uar taka sawia a taka kalpui thei tura hma la theuh turin Officer te a sawm bawk a ni.
Naktuk February ni 6, 2013 hian MEIOA General Conference neih chhunzawm leh a ni ang a, hruaitu thlanna neih nghal tur a ni ang.
