Aizawl District Sports Committee (ADSC) te buatsaih, April ni 22 atanga ni 26 inkar chhunga neih Aizawl District Sports Meet chu Vawiin April ni 26, 2013 (zirtawpni) khan Pu S.Laldingliana, Parliamentary Secretary, Sports & Youth Services chuan a khar ta.
Kharna Inkhawm hi Hawla Indoor Stadium, Republic Vengthlang-ah neih niin Dr. Franklin Laltinkhuma, IAS, ADSC Chairman ni bawkin a kaihruai a. B.Lalchhanhima, Secretary ADSC in Technical Report a pek bakah Pu C.Lalthantluanga, Secretary MSCC in thusawina hun a hmangin Pu K.Laldawngliana, V.Chairman ADSC in Vote of Thanks a sawi bawk. He huna thusawitu Pu S.Laldingliana, Parliamentary Secretary chuan Hruaitu tha tak tak neitu ADSC te thawhrimna avang liau liau a Aizawl District Sports Meet Vawikhat-na buatsaih a ni thei chu lawmawm a tih thu a sawi a. Theih tawp chhuaha ke pen zul turin ADSC hruaitute a fuih. Pu Dinga chuan infiam mi kalkhawmte hnenah fuihna thuchah sawiin, " Infiamna kawnga mi hlawhtling ni tur chuan zuk leh hmuam, ruihhlo lakah kan fihlim a tul a. Tin, infiam mite hian kan Line kan thlan thiam a ngai tak meuh a, Discipline hrang hrang thiam zul rikngawt ai chuan kan kalna awm kawng thlan fela theihtawp chhuah tura tanlak hi hlawhtlinna kawng pawimawh tak a ni" a ti a, A sawi zelna ah Pu Dinga chuan, "Cho chhuah tham talent an nei tih hria a kan sawrkar in Thalaite infiamna kawnga theihtawp a chhuahsakna hi a ropui em em a, chuvangin thalaite pawhin hei hi tangkai taka in hman ka beisei tlat a ni" a ti bawk.
He Sports Meet-ah hian Discipline pasarih (7) heng Athletics, Boxing, Kick boxing, Judo, Rifle Shooting, Taekwondo, Tug of War te awm in. heng zawng zawng atang hian Aizawl huamchhung Club 10 atangin infiam mi 613 an thawk chhuak a ni.Athletics ah hian Zemabawk Sporting Club ten pakhatna an la a. Boxing ah hian Sports Authority of India (Green) ten pakhatna an hauh bawk a. Judo ah hian TNT Judo Club te an champion ve leh bawk. Rifle Shooting ah hian Electrict Veng Sporting Club ten lawmman pakhatna an la a. Taekwondo ah Sports Authority of India (SAI) te Champion in Tug of war (Mipa) ah Durtlang North pakhatna an ni a, Hmeichhia-ah Zemabawk North te an Champion bawk a ni. Kick Boxing result erawh chu he thu buatsaih lai hian hriat a la ni lo.
ADSC hi August ni 6, 2010 khan District Sports Dicipline hrang hrang kalkhawm ten Aizawl DC Office Chamber-ah an din a ni a. Tunah hian Office Bearers mi panga (5), Member mi sawm pali (14), Adviser pahnih (2) te nen an vaiin mi sawmhnih pakhat (21) an awm mek a ni.
