Nimin chhun dar 12:00 khan Pu S.Hiato,  Minister  i/c PHED,Industries..etc  chuan Lungbun khua leh Richa (Chhimtuipui/Kolodyne) inkar  a 11km a thui  kawng sial thar chu Ribbon chep chat in a  hawng. HeLungbun-Richa Agriculture Link Roadhi BRGF sum atanga  laih niin, Chhimtuipui lui hausakna mipui vantlang tana awlsam taka haihchhuah theih na tura laih a ni.

 Kawngthar hawnna inkhawm hi Chhimtuipui(Richa) kama India ram lamah hman   a ni a. India ram lama hawnna inkhawm hman hma hian Myanmar lamah Minister hmuahna hun hman phawt  niin, Myanmar lam chhimtuipui (Richa)   hnaih khua: Vawngtu, Tlawngrang ‘A’ leh ‘B’ mipui ten ropui takin, Myanmar MP (Member of Parliament )Thantlang bialtu Pu Robin-a hovin Minister hi  lo hmuakin, an thalaiten hnamlam te an entir bakah thilpek chi hrang hrang official kal te an lo hlan bawk a ni. Minister pawhin heng khaw thum ho hnenah hian; Football-1, Guiter-1, Volley Ball leh Net, PA set-1 leh Thingpui in na no-24 theuh leh Reception organising Board hnenah tangka fai  Rs 20,000/- a hlan ve  bawk.

He Minister an lo hmuahna-ah hian  Minister hming chawi a kawngpui  sial tur  “ S.Hiato Road “ (Richa to  Vawngtu Via Tlawngrang ‘B’ ) leh  Minister  thiannu hming chawi a kawngpui sial tur “ K.Ngola Road “ (Richa- Tluangram ‘A’ )   lungphun chu Minister te nupa  in an hawng nghal bawk a ni.

 Myanmar lama reception programme hman zawh a nih hnu hian, India ram lamah “Lungbun-Richa Road”  hawnna programme Myanmar lam unaute  nen hman ho niin, zanriah an kil ho nghal a . Zanriah chawhmeh atan hian Vawngtu khua in Sial pakhat, Tluangram  ‘A’ in vawk pakhat  Tlawngrang ‘B’ in Bawng pakhat  leh Lungbun khua in Vawk pahnih talhin  zanriah an buatsaih..

He kawng hawnna inkhawm Pu MH.Tiabi,EM(Rev) MADC kaihhruaiah hian thusawiin, Minister chuan tunah hian Dmocracy lam hawiin Myanmar  sorkar pawh  chak takin ke a pen mek a, chuvangin  Lungbun-Richa Road  hi Lungbun atanga chhimtuipui lui hausakna  lakchhuahna  tur mai chauh ni lovin, Myanmar rama  kan  unaute ho nen kan hma lam hun reilo tea insumdawn tawnna leh inkal pawhna tur pawimawh tak  leh kan in unauna ti nghet zual sauh tu tur  pawimawh tak pakhat a ni, a ti. Minister chuan sawi zelin,India sorkar laipui pawhin inkalpawhna kawng tha siam a, insumdawn tawnna leh intlawhpawh tawnna hmanga Myanmar ram Democracy lam hawia ke a penna kawnga  lo tanpui ve hi a rilru a nih avangin, tuna BRGF sum awmsa atang hian Myanmar lam Richa to Vawngtu Road  5Km kan lai tan phawt dawn a ni, a ti bawk.

He kawng hawnna inkhawmah hian Pu Robin, MP, Chin National Party,Myanmar, Pu Jim.K. Chozah,Director, I&PR, Pu Vabeiha Hlychho, Director, Tourism te pawhin thu sawina hun an hmang.

Lungbun- Richa Road hawnna inkhawmah hian Pu S.Hiato hi Aizawl atangin, Pu H.Zothangliana, Parliamentary Secretary, Director ;I&PR, Director; Tourism, Chief Engineer ;PHED, Deputy Commissioner; Excise& Narcotics leh Assistant Director;RD ten an lo tawiawm a. Saiha atangin DC, SP leh Mizoram sorkar hnuaia Head of Office te , MADC a hruaitute leh  Head of office te , NGO hruaitute leh Party hruaitu ten an tawiawm bawk.