March ni 27 - 31 chhunga neih XV Mizoram Police Sports Meet 2012 chu nimin khan Rajiv Gandhi Stadium, Mualpui-ah Khuallian Home Minister Pu R. Lalzirliana’n a khar. Police Sports Meet kharna inkhawmah hian Mizoram Youth Commission Chairman Pu Hmingdailova Khiangte IPS (Rtd), Mizoram DGP Pu Lalrokhuma Pachuau, Principal Secretary, Disaster Management Pu P.C. Lallawmsanga, DIG (Northern range) Pu Zorammawia te bakah Mizoram Police hotu dangte an tel kim hle a ni.
Police Sports Meet-a medal late hnenah lawmman a hlan zawh hnuah Khuallian Pu R. Lalzirliana chuan thu sawi zuiin hmun tam takah harsatna awm laiin Mizoram police ten Sports Meet tluang taka an nei theih chu ‘remna’ hlutna tilangtu a ni, a ti. Mizoram police te inpekna leh thawhhona that avangin mipuite rin an hlawh em em a, kawng engkimah Mizote tan kaihruaitu leh entawntlak ni turin mahni inthunun leh taimakna ngai pawimawh zel turin a chah. Rajiv Gandhi Stadium chu Home Department kutah sorkarin a hlan a, 3rd MAP-in an enkawl dawn a, hei hi police te tan vanneihna a ni, a ti bawk. Sports Meet intihsiaknaa tel leh Mizoram hmun tina police awm zawng zawngte duhsakna hlanin Home Minister chuan XV Police Sports Meet hi a khar a ni.
Mizoram DIG Pu Lalrokhuma chuan kalkhawmte lawmna thu sawiin Mizoram Police te an duty tha taka an hlen theih nan sorkarin chak takin tan a la zel a, chuvangin kan thlen chin atangin hmasawn ngei kan tum tur a ni, a ti a. Ram chhung leh pawnah Mizoram aiawha police player chhuak thin ten medal an hawn thin chu chhuanawm leh entawntlak a tih thu a sawi bawk.
XV Mizoram Police Sports Meet Organising Committee Chairman Pu Saizela, DIG (Hqrs) chuan Technical Report a pe a. Mizoram Police Sports Meet hi kum 1987 atang khan neih tan a ni a. Police te hi khawi hmunah pawh, ram mipuite him nan leh zalen nan englai pawha rim leh hah taka hnathawk an nih avangin kum thenkhatah chuan Sports Meet hi an nei thei lova. Kumin Police Sports Meet 2012 ah hian Police Unit hrang hrang 24 atangin Contingent 11 an tel a, an zavaiin participants 1030 niin infiamna chi hrang hrang 25-ah an intihsiak a ni. 1st Bn. MAP te chu Gold-15, Silver-18 leh Bronze-10 lain Over-all Champion an ni a, Runners-Up 2nd Bn. MAP te chuan Gold 15, Silver-7 leh Bronze 13 an la thung. Kumin Meet-ah hian 3rd IR Bn. te chu Assam State-ah an duty avangin an tel ve thei lo a ni.
Tarlan tawh angin March 27, 2012 (Thawhhleni) khan XV Police Sports Meet hi Sports Minister Pu Zodintluanga’n Rajiv Gandhi Stadium, Mualpui-ah a hawng a, sorkarin he Stadium hi Home Department kutah a hlan thu a puang nghe nghe a ni.
