Lunglei HPC Vice-Chairman Pu S.Laldingliana chuan vawiin khan Lunglei Luangmual Community Hall thar a hawng a, Luangmual khawtlang mipuite chu lawmpuina leh duhsakna a hlan a ni.

Community Hall hawnna inkhawmah thu sawiin Pu S.Laldingliana chuan Sports Council leh Sports Department atangin sum dapchhuah niin Luangmual khawtlangin an duh ang takin hall chu sak a nih thu a sawi a. Sorkar hmalakna hrang hrangah mipuite tawiawmna a tha em em a, Luangmual-ah pawh hmun tha pek a nih chuan Health Sub-Centre changtlung zawk sak nghal a ni thei ang, a ti. Luangmual chu Veng naupang nimahse an hmasawnna tur kawngah khawtlang mipuite chu tanrual thiam tur leh an mamawh thilah sorkar pawh thurawn pe turin a chah a, an vengchhung kawng pawh siamthat a nih tur thu a hrilh bawk a ni.

Hall Organising Committee Secretary Pu K.Lalrawngbawla chuan Hall sakna hmun leh sum chu Bialtu MLA a nih angin, Pu S.Laldingliana-in a ngaihtuahsak a nih thu a sawi a, Veng mipuite aiawhin lawmthu a hrilh a ni. Luangmual Community Hall chu a dung 63ft., a vang 36ft. niin Cheng nuai 40 chuang hreta sak zawhfel a ni.

Vawiina Community Hall hawnna inkhawmah hian HPC Vice-Chairman chu a nupui Pi Lilypari Sailo, ARCS Lunglei, Co-operation Dept. leh Lunglei MJA President Pu H.Lalthansanga ten an tawimawm a ni.