RMSA hnuaia sak leh thawm that Govt.Thingfal High School building thar chu vawiin khan Lunglei HPC Vice-Chairman Pu S.Laldingliana’n a hawng.

School building thar hawnna inkhawm Lunglei DEO Pu Lalrambuatsaiha kaihhruaiah Khuallian Pu S.Laldingliana chuan RMSA hnuaia Thingfal H/S building thawmthat hna chu kum 2011 khan tan tawh mahse Contractor chhawr fuh loh avangin a pamtul a, khaw dangah RMSA building thar hawn a nih laiin Thingfal-ah hawn theih mai ta lo chu pawi tih thu a sawi a. Vawiinah Thingfal High School building thar hawn a ni ve thei ta chu a lawmawm takzet a ni, a ti. Kumin hi chhimlam tan zirna lamah kum tha leh kum lawmawm tak a nih thu tarlangin Pu S.Laldingliana chuan Thingfal H/S zirlaite fuhina thu sawiin zirlai bak chu thildang, kohhran leh khawtlang lamah pawh inhmang tlem turin leh an zirna chu ngai pawimawh hmasa ber turin a hrilh. Zirlai naupang ten hlawhtlinna an hmuh theih nan zirtirtute piah lamah nu leh pa te pawhin an fate lehkha tha taka an zir theihna turin hun awl siam sak an thiam a ngai a, an zirnaah rilru an pe thei turin hna dangah chhawr tlem turin a chah bawk.

Hawnna inkhawmah hian Pu Joseph Lalngaisanga Chhakchhuak, Coordinator, RMSA Mission, Lunglei District chuan Report pein ‘Strengthening of Govt.Thingfal H/S under RMSA’ zawhfel nan Cheng 35,25,000/- sen a nih thu a tarlang a. Govt.Thingfal H/S thawmthat a nih hnuin he sikul-ah hian Classroom 2 bakah Computer Room, Science Laboratory, Library, Arts & Crafts Room, Emergency Exit te dah niin mipa leh hmeichhia te tan Toilet hran sak leh Generator pawh dah a ni tih a sawi a. Govt. Thingfal H/S hi tuna thawmthat a nih hnuin ‘Smart Classroom’ nei vek thei tura ruahman sak a nih thu Pu Joseph hian a tarlang bawk.