K Pop Contest leh Show nei tur Korean Pop star Hyemin Jung leh amah tawiawmtu Korean Cultural Centre India-a Director leh midang 9, an zavaiin 11 te chuan vawiin khan Aizawl an lo thleng ta a. An rawn thlen veleh State Guest House-ah Press mite an kawm nghal a ni.

KCCI Director Pu Kim Kum Pyoung chuan tun tuma K Pop Contest hi North East ah a tum hnihna a nih thu leh nikumah Dimapur, Nagaland-ah neih a lo ni tawh tih a sawi a. Hetiang Contest hi kum 2012 atang khan neih a ni tawh a ni, tiin India leh Korea inkara inlaichinna tha a awm theih nan Cultural Exchange programme hrang hrang neih tawh thin a ni, Pu Kim chuan a ti a. Tawng inzir tawnna te pawh tih a lo ni tawh thin a ni, a ti.

K Pop star Hyemin Jung chuan Press mite zawhna chhangin naktuka K Pop Contest chu a endik dawn bakah zaia mipui a awih dawn thu a sawi a. Airport a anlo thlena amah lawmtu mipui tamtak a hmu chu a lawm thu leh ropui a tih thu te, mizote chu hmel hmuh nuam leh kawm chakawm tak tak an ni hlawma a hriat thute a sawi a ni.

Tun tum Korean lo kalte hi Korean Ambassador Pu Lee Joongiu leh Chief Minister Pu Lal Thanhawla te inkawmna leh inbiakna in a hrin chhoh zel a ni a, an zavai hian Korea leh New Delhi Korean Embassy atangin mi 11 an lo kal a, Journalist pahnih an tel bawk a ni.