Vawiin khan The Grand Hotel, Chanmari, Aizawl-ah Pu T. Sangkunga, Chairman, Mizoram Youth Commission chuan PC Consulting Pvt. Ltd. te bultuma buatsaih Hotel Management training chhuakte hnena certificate hlanna a hmanpui.
Mizo thalaite lo fel zia hmuh turin an awm zel a, state pawn han kal chang pawhin 5 star leh a chunglamah te thleng pawhin smart tak taka Mizo nulate thawk hmuh tur an awm chu a lawmawm thu sawiin khuallian Pu T. Sangkunga chuan tih takzeta thawktute hmel hmuh a nuamin a lawmpui thu a sawi a. Vawiina training chhuak certificate dawngtute pawh chu an kalzelna turah duhsakna hlanin Mizo hnam ti hmingtha a, hlawhtling taka kalzel turin a chah a. Khawvelah hian mi pakhat tan hnathawh tur hi a tam lutuk a, thawh that duh phawt chuan kawng pawh a inhawng zel a ni a ti bawk.
Chairman anih chhungin mi 5000 chuangin Mizoram Youth Commission atanga Mizo thalaite eizawnna puitling nei tura thiam thil zira kaltir an nih tawh thu sawiin khuallian chuan tunah hian chung zinga thenkhatte chuan hlawhtling takin state pawna hmun pawimawh tak takah hna an thawh bakah India ram pawn thleng pawha thawktu tha tak tak an awm tawh chu an hlawhtlinna ah a lawmpui thu leh tih takzeta thawk zel turin a fuih bawk.
Mizoram Youth Commission hmalakna hrang hrang sawiin Pu T. Sangkunga chuan tunah hian P.C. Consulting Pvt. Ltd. te nen an thawh ho thu a sawi a. NE pum training na tur Aizawl-ah din tum a niin tum khatah naupang 30 zel zirtirin hostel te pawh siam tum a ni tiin Burma passport hmang lova India passport hmangin Kolkata atanga chhuaka Singapore leh khawvel ramdanga hnathawk tura kalte tana hma an lak thu leh IAS Coaching Centre pawh tunah hian buaipui mek in Dinthar Veng Primary School chu zirna hmun atan tinzawn a nih thu a sawi bawk. Chutih rualin Assam Rilfes hovin sipai ni tura Mizo thalaite training an pek dan ngaihtuah a nih thu leh a thente phei chuan tunah pawh an training mek thu a sawi bawk.
Vawiin programme ah hian Pi Rose Zothanmawii, Managing Director, PC Consulting Pvt. Ltd. in thusawiin Dr. J.T. Vanlalngheta, Secretary MYC in fuihna thuchah a sawi a, programme hlimawm tak buatsaih a ni bawk.
