DONER kaltlang Non Lapseable Central Pool of Resources (NLCPR) sum cheng nuai 827.38 senga siam South Khawbung Water Supply Scheme (Pumping) chu vawiin chawhma khan tangkai taka hman theih turin East Tuipui bialtu MLA Pu T. Sangkunga chuan tui pump khawl hmet nungin a hawng.

Hawnna pual inkhawm Khawbung Community Hall-a neihah thusawiin Pu T. Sangkunga chuan S. Khawbung, Zawlsei leh Khuangthing khuate hnianghnar taka tui pe thei tur hawn a ni chu lawmawm a tih thu a sawi. Tui hna siamtu ramngaw chereu  tak zel avanga tui harsatna a zual zel laia a bial chhunga lui pawimawh tak atanga tui lakna tha tak siam thar ani  chu ni chhinchhiah tlak ani tiin, hmalatu department lam leh khawtlang hruaitute a fak a. A  bial chhunga hmalakna lian tak tak NABARD sum cheng vaibelchhe 48 hmanga Tuipui-Dungtlang-Khuangleng-Dilkawn kawngpui pavement siamte, Khawbung khuaa cheng vaibelchhe 3.5 senga Mini Sports Complex sak mek leh Tlawva Mini Hydel Project siam mekte chu nakin lawka chhenfakawm tak tur anih thu a sawi a. BADP sum leh NEDP sum hmanga hna tam tak thawh anih thu sawiin, Khawbung PHE SDO Qtrs sakna tur cheng nuai 24.5 pawh dahfel anih thu a sawi a. A hun chhungin a bial chhungah hmasawnna tam tak thawh anih thu sawiin, sawrkar duhsakna dawngin inkalpawhna kawng, eng leh tui pek kawngah nasa taka hna thawh a ni, a ti a. Hmasawnna hna chak taka thawh anih theihna kawnga sawrkar official leh bial mipuite tawiawm thinnaah lawmthu a sawi bawk a ni. 

Hawnna inkhawm hi Er. H.B Chakma, SE, PHED Champhai WATSAN Circle chuan a kaihruai a. Pastor Lalhunliana Royte-in hunserh a hman hnuah Technical report Er. J. Kapkima hnen atanga ngaihthlak a ni a. Pu F. Vanlalriana, VCP Khawbung; Er. K. Lalhmingliana, Sr. EE, Nodal Officer, SBM (G) leh Er. J. Lalhmachhuana, EE, P&E, Champhai WATSAN Division ten thu an sawi a. Er. C. Lalchawimawia, Sr. SDO, PHED Khawbung WATSAN Sub-Division-in lawmthu sawina neiin hun a khar a ni.

South Khawbung WSS hi khua atanga Aizawl Road kilometer 17 a hla khawchhak Tuipui kama awm niin tui lakna hnar ber  chu Tuipui  Lui a ni a. Hna hi kum 2012 atanga tan a ni a, 2013 ah commission niin kum 2018-ah hawn mai theiha peihfel a ni. Tuilakna thar hian S. Khawbung, Zawlsei leh Khuangthing khuate a chawm thei dawn a, nitin tui litre singthum sang riat pump chhuak thei tura beisei a ni a, electrict khawl 500 KVA leh  Diesel Generating Set 500 KVA te bunfel a ni bawk. 

Khawbung WSS atanga khua thleng tur hian tui pipe lian kilometre 11 a thui vuah niin, Total head hi metre 957 a sang a ni a. Design ang chuan kum 2044 thlenga nikhata darkar 22 tui pump thei tur leh a chawm khuate hneh taka tui pe thei tur, mipakhat zel nitin tui litre 70 pe thei tura ruahman a ni a. Tui dahkhawlna tur Tankey lian litre nuaikhat leh singnga  dawng khawchhungah siam ni bawkin heta tang hian Public point leh Private connection-ah te semchhuah a ni dawn a ni. 

Hawnna hunah hian Er. Lalmuanzova, MES, Engineer-in-Chief, PHED, PHED hotute, P&E hotute, sawrkar official leh Khawbung leh a chhehvel khua a khawtlang hruaitu leh mipuite an tel a ni.