956/2023-2024

Khawzawl, the 28th June 2023: Vawiin chawhma dar 10:30 khan Khawzawl District Fisheries Development Office buatsaihin Sangha khawitute pual inzirtirna, Capacity Building & Training of Fish Farmer Under RKVY RAFTAAR 2020-2021 chu Khawzawl DC Conference Hall-ah neih a ni a, he hun hi Deputy Chief Minister Pu Tawnluia, Tuichang AC bialtu MLA ni bawk chuan khuallian niin a hmanpui.

Khuallian Pu Tawnluia chuan Chief Minister kaihhruaina hnuaiah Sawrkarin Khawzawl District tan hmasawnna nasa tak a thlen thu sawiin, chung zinga pakhat Khawzawl District-a Fisheries Department Office hawn thar a ni leh thawktute'n thahnemngai taka mawhphurhna an hlen thin chu chhuanawm a tih thu a sawi a. Khawzawl District-ah sangha khawi hlawhtlin theihna hmun leh theihna nasa tak a awm avangin hmalak phurawm a tih thu a sawi a. Sangha khawitute chu sawrkarin min pui anga hna kan thawk ang tih rilru pu lova, kan thawk anga sawrkarin min pui ang tih rilru pu zawk thin turin a fuih a. Khawzawl District-in kum 4 pum hlum chauh chunga hmasawnna hmel thar a hmu zel chu lawmawm a tih thu sawiin, Pu Zoramthanga kaihhruai sawrkarin khawzawl tan hna a thawk nasa hle a, Covid-19 in nasa takin kan sawrkar hi hnathawh kawngah tibahlah mah se tunah chuan hma kan sawn zel a, hma kan la sawn zel dawn a ni, a ti bawk.

Deputy Chief Minister chuan Khawzawl District chu District hmasawn berte zinga mi a nih thu sawiin, bialtu a nih angin chhungkaw tinte retheihna ata khaichhuah chu a ngaih pawimawh a nih thu a sawi a, hemi hmanrua atan hian sawrkarin SEDP programme a duang a ni a ti. Tualte-ah tomato hlawhtling taka chin a ni te, Sialhawkah hlawhtling taka lakhuihthei chin a ni leh a market hmuh zel a nite chu lawmawm tiin, heng bakah hian khaw hrang hrangah hmalakna thar kan nei mek a ni, a ti bawk a. Khawhaiah leh Chawngtlaiah Sapthei kan ching tan leh mek bawk a, tunah Khawzawlah Sangha khawi lamah hma thar kan la leh hi a phurawm takzet a ni a ti a. Sangha khawitute chu tam zawk thar chhuak thei turin Fisheries Department-te nen theihtawp chhuah turin a fuih a. Tih tak takna nena hnathawh chu hlawhtlinna a nih thu sawiin, Pathianin ram tha tak tak min pe a, taimak kan chhuah phawt chuan hlawhtlinna kan chang thei dawn a ni, a ti bawk.

He hun hi Khawzawl DC Pu K.Lalrohlua'n a kaihruai a, DFDO Pu Zohmingthanga'n report a pe a. Pu Vanlalpeka, DFDO Office, Khawzawlin lawmthu sawiin hawnna hun hman hi a khar a. Hemii hnu hian technical session neih a ni a, Pu Vanlalhmangaiha, Fisheries Demonstrator-in 'Dil siamdan leh enkawl dan (Construction of Fish pond and management) tih thupui hmanga zirtirna a pek bakah Pu Zohmingthanga, DFDO Khawzawl-in 'Luidung humhalh leh a pawimawhna (Riverine Conservation)' tih thupui hmangin zirtirna a pe a. Practical/Demonstration Session neih a ni bawk a. Zawhna leh chhanna hunte hman niin training hlawkthlak tak neih a ni.