955/2023-2024

Aizawl the 28th June 2023: Kum 1986-a Mizo National Front (MNF) leh sawrkar laipuiin remna thuthlung an ziah vawi 37-na pualin vawiin khan MINECO-a Open Gym bulah ceremonial tree planting (thingtiak phun) hun hman a ni a. He hunah hian Chief Minister Pu Zoramthanga chu khuallian niin Chief Secretary Dr. Renu Sharma bakah Principal Secretary EF&CC Pu Navin Kumar Choudhary, Principal Chief Conservator of Forest, Pu RK Singh, GAD Commissioner & Secretary Pu K. Lalthawmmawia leh official dangte an tel a ni.

Chief Minister chuan kum 1986-a MNF leh sawrkar laipuiin remna thuthlung (peace accord) an lo ziah chuan Mizoram-ah remna leh muanna tluantling a thlen thu sawiin Mizorama kum 20 chuang buaina chu a reh thei ta a ni a ti. Rambuai lai chuan Mizoram chu manganna raltitna authawm in a luahkhat thin thu sawiin India hmarchhak mai nilo, Asia khawmualpuia chhim-chhak (South-east Asia) a ram ralmuanglo ber a ni hial a ni a ti a, Tunah chuan hnam sipai huaisente zarah India rama state ralmuang ber leh midangte entawn ber a ni ta hial a ni tiin ropui a tih thu a sawi.

Vawina phun tak Thlado thing tiak thlangtu Forest Department-te chu fakin thlan tur tak an thlang a ni a ti a, Thlado thing chu fei leh tlo tak anih avangin pi puten in sak nan an hman ber thin a ni tiin remna ni puala phun a ni chu a inrem hle a ti bawk. Khawvel boruak inthlak danglam nasat avanga khuarel chhiatna thleng fo laka him nan environment humhalh a pawimawh hle tiin Mizoram pawhin theihtawpin hma a la chho mek a ni a ti a, remna ni puala thingtiak phun a ni chu lawmawm a tih thu a sawi bawk.

Pu Zoramthanga chuan Mizoram ralmuanna chu state dang leh ramdangte awh ber a ni tiin Mizoram in thawnchhuah tur a neihte zinga hlu ber pakhat a ni a ti. Ramdang leh state thenawm atanga sahimna zawnga lo lutte chungchang pawh sawi langin khuallian chuan rilru leh taksa damna zawnga rawn kalte chu hmangaihna nena lo tuamhlawm turin kalkhawmte leh Zoram mipuite a chah a, Mizoram chu state ralmuang ber a nih zel theih nan thawhpuiah a sawm bawk a ni.

Remna ni pual ceremonial planting hun hmanah hian Dr. Renu Sharma, Chief Secretary leh GAD Commissioner & Secretary Pu K. Lalthawmawia pawhin thusawi tawi an nei bawk a, Conservator of Forest (CC) Pi Lalrammawii Sailo chuan lawmthu sawiin hun a khar.

Principal Chief Conservator of Forest, Pu RK Singh chuan ceremonial tree planting lawmpui nan Chief Guest leh Chief Secretary hnenah thingtiak a hlan a ni. Khuallian chuan Remna ni vawi 37-na pual hian balloon 37 a thlawhchhuah tir a, open gym bulah official dangte nen thlado thingtiak an phun bawk a ni.