954/2023-2024

Lunglei the 28th June,2023: Vawiin chawhma khan Pi Carol VLMS Dawngkimi, Director, Art & Culture Department chuan Sazaikawn, Lungleia District Museum Building, Ministry of Culture, Government of India kaltlanga sak mek chu a hmunah a tlawh.

Arts & Culture Department Director in a tlawh Lunglei District Museum sak nan hian Central Sawrkar Ministry of Culture chuan Cheng Nuai 827 tumin Mizoram Sawrkarin Cheng Nuai 91.91 a tum ve a, tun dinhmunah hnathawh nan hian Cheng nuai 620.41 hman ral tawh niin, final installment nghah mek a ni.

He building sak hna hi Okahito Consultancy Services, Khatla, Aizawl ten an thawk a, Museum building hi Zopa chhiara chhawng thum niin a dung feet 148 a thui niin a vang feet 80 a zau a ni a, building hi sak zawh tep a ni tawh. Museum-ah hian Gallery hrang hrang siam niin heng zingah hian Lunglei District History tarlan theihna tur Gallery pawh dah tura ruahman a ni.

Building sak mek tlawhtu Arts & Culture Department Director Pi Carrol VLMS. Dawngkimi chuan Lunglei District huamchhunga mimal, chhungkua, pawl, kohhran-te leh sawrkar office hrang hrangten Lunglei District History tana pawimawh thil hlu kawl an nei a nih chuan Lunglei District Museum-ah tlawmngaia dah turin a ngen a ni. Mizo hnam tana pawimawh leh hlu nei leh kawl ten Lunglei District Museum-a dah thei tur hian ngaihtuahna lo seng a, lo inruahman lawk tura a duh thu leh donate tute hming chu kumkhuaa tarlan a nih dawn thu a sawi.

Museum object lak khawm dan kawng hrang hrang Purchase, Gift, Loan, Exchange, Treasure Trove, Chance Finding leh Excavation-te a awm tih Director chuan sawi bawkin, ram leh hnam tana thil hlu tak, mahni in lama kawl mekte tan engemaw huna a riral mai lohna tur leh tha zawk leh mumal zawka enkawl chunga mipui tana tangkai zawka pholan a nih theihnan District Museum Lungleiah hian a donate theih reng a ni tiin hetiang donate tur nei mimal emaw pawl emaw te chuan donate thei ngei se a duh tih a sawi bawk a ni.

He hunah hian Art & Culture Department Officer leh Staff-te, DIPR leh Chanchinbu mi ten an tawiawm a ni.