953/2023-2024

Aizawl 28th June 2023: Directorate of Economics & Statistics chuan vawiin khan ‘National Statistics Day’ ' vawi 17-na chu Economics & Statistics Conference Hall-ah an hmang a, he hunah hian Pu Lalmalsawma Pachuau, Secretary, Planning and Programme Implementation Department chu khuallian niin a hmanpui.

Khuallian chuan ramin hmasawnna tha leh dik a neih theih nan ‘statistic data’ felfai tak a ngai a, Mizoramin data rintlak a neih theihna tura thahnem ngai taka thawk thin Economics & Statistics Department te chhuanawm a tih thu a sawi. Economics & Statistics Department-ten ‘Statistical Handbook’ an tihchhuah thin chu mi tam takin an hmang tangkaiin an hlawkpui hle a, data felfai tak anih avangin in ram hmasawnna tur a ke pen naah nasa takin a tanpui a ni, a ti. Naupiang leh mitthi chungchangah nitin data khawn theih a ni chu fakawm tiin state dang tam takin an tih theih loh a ni a, a lawmawm hle a ti.

Mizoram chu Sustainable Development Goal (SDG) kalpui tha ber zinga mi a nih tih tarlangin ‘Localization of SDG’ kalpui mekah khawtinin hmasawnna thar an neih theih nan Department-te tang turin a fuih a. District Research Officer-te pawh an mawhphurna hria a tun aia tangmar turin a chah bawk.

Pu Lalmalsawma chuan thawhhonna tha a pawimawh hle tih sawiin, sawrkar hna nuam tak leh awmze nei a thawk turin midang nen thawhdun thiam a tul hle tiin thawhhonna tha tak nei zel turIn a chah a. Economics & Statistics Department-ten kum tawp a Golden Jubilee-an lawmna turah duhsakna hlan nghalin Mizoram tan theihtawp chhuah a thawk zel turin a sawm a ni.

Pu B. Sanga, Assistant Director chuan Statistics Day-lo chhuah dan, National Statistics Day chu ‘Father of Indian Statistics’ Prof. P.C. Mahalanobis piancham pha phaka hman thin anih thu leh a chanchin tawi sawina a nei bawk.

Vawiin ‘National Statistics Day’ hmanna inkhawm hi Pu B. Lalrinhlua, Director, Economics & Statistics Department chuan a kaihruaia, Pi Mary Lalrinchhungi, Deputy Director-in Director kalchhuak tawhte thilpek hlanna neiin Pi Ngurbiakkimi, Dy. Director (Administration) chuan lawmthu sawina in hun a khar a ni.

Chawhnu lamah hian Ministry of Statistics & Programme Implementation-in thupui a rawn thlan ‘Alignment of State Indicator Framework with National Indicator Framework for Monitoring Sustainable Development Goals’ hmangin seminar neih a ni a. Pi B. Vanlalruati, Dy. Director-in kaihruaiin Pu Isak Lalmuanpuia Chuaungo, Economist cum Under Secretary, Planning Department leh Pi Zopuii Khiangte, Consultant, SDGs Co-ordination Centre-ten thupui thlan hmang hian zirtirna peiin sawihona hun hman nghal a ni.

National Statistics Day hi kum tinin June ni 29-ah hman thin a ni a, kuminah hian sawrkar chawlh a nih avaning June ni 28 ah hman a ni.