952/2023-2024

Chawngtlai, 28th June, 2023 : Rural Development Minister Pu Lalruatkima chuan vawiin chawhnu khan cheng nuai 292.98 senga sak Chawngtlai RURBAN Commercial Centre a hawng.

Hawnna puala inkhawm Chawngtlai RURBAN Commercial Centre chhunga buatsaihah Minister Pu Lalruatkima chuan thu sawiin SPMRM RURBAN kaltlangin hmasawnna hna tam tak kan thawk a, thingtlang khua ten khawpuiin hmasawnna an hmuh ang an hmuh phak ve zel theihna turin kan phak chin chinah hma kan la a. Eizawnna ngelnghet nei tura inkawhhmuhna te, hmasawnna ruhrel pawimawh chi hrang hrang thawh te a tel a. Kan hmalakna te mipuite leh official te thawhhona tha tak avangin a hlawhtlinna kan hmu zel a, Mizoram chu India ram state zinga thawk tha ber dawttu kan nini hial a ni, a ti a. He Mission hi India ram pumah tun thla tawp ruala tawp tur a nih laiin Mizoram chu kumin December thla tawp thleng min pawhsei sak a ni a ti bawk.

Pu Ruatkima chuan Chawngtlai leh a chhehvel khuate chu khaw taima, buh leh bal, thlai leh theirah chin kawngah pawh hlawhtling tak tak an nih avangin he commercial centre hi a tangkai hle dawn a ni a ti a. Dimdawi taka enkawl tura chahin hlawhtlinna hmel thar hmuh tirtu ni ngei se a duh thu a sawi a ni.

Vawiina hawn tak Chawngtlai RURBAN Commercial Centre hi Ministry of Rural Development, Government of India in Shyama Prasad Mukherji Rurban Mission (SPMRM) kaltlanga sum an rawn pek hmanga sak a ni a. A satu hi Mizoram Technocrats Company Pvt. Ltd. Tuikhuahtlang, Aizawl te an ni. A project hming hi "Construction of Agro Processing Centre & Warehouse at Chawngtlai" a ni a, September ni 17, 2021 khan sak tan niin December ni 27, 2022 khan sak zawh a ni a. Khawl chi hrang hrangte hi January ni 10, 2023 khan bun tan niin June ni 10, 2023 ah bun zawh a ni. A building hi IS Code for Seismic Zone-V specifications anga design a ni a, concrete structure atan hian IS Grade 20 (M-20) hman a ni a, Steel Reinforcement Design & bar bending zawng zawng hi IS 456 Design Specifications anga siam a ni.

Building ground floor hi square metre 284 a zau niin Mezzanine floor hi square metre 12.25 a zau a ni a. Damdiai CLF (Cluster-Level Federation) ten an enkawl dawn a ni.

Ground floor-ah hian Processing Unit (Sorting, Washing, Grading & Packaging), Controlled Temperature Storage Room (Cold Storage) 1, Hygiene Zone, Grain Storage Room 1, Fruits & Vegetables Storage Room 1, Common Changing Room 1, Men & Women Wash Room 1 ve ve, Kitchen-cum-Restaurant 1, Market Shed, Unloading Dock 2 (fruits - Vegetables), Loading Dock 1 leh vantlang inthiarna hmun a awm a. Mezzanine Floor hi Administrative office atana hman tur a ni.

Chawngtlai RURBAN Commercial Centre-ah hian khawl chi hrang hrang a hnuaia tarlan te hi dah a ni -

1. Rotary Vegetable Washer
2. Inspection Conveyor
3. Conveyor with Hot Air Generator
4. Weighing Scale
5. Carton Strapping Machine
6. Washing Vat with fruit movement arrangement
7. Semi-Automatic Side Cutter
8. Semi-Auto Pineapple Peeling System
9. Fruit Crusher
10. Pulper
11. Weighing Scale 2 - Digital Display (200 kg & 1000G)
12. Hand Refractometer - ERMA (Type B - Range 28-62% & Type C - Range 58-92%)
13. Stainless Steel Collection Vessel
14. Electrically operated Jacked mKettle incorporated with separate Mechanical Agitating System
15. Stainless Steel Transfer Pump
16. Homogenizer (Double Stage)
17. Juice Pasteurizer
18. Semi-Automatic Volumetric Filling Machine (twin head model)
19. Single Head Rotary Screw Type Cap Sealing Machine.
20. Grading & Sorting Machine

Tui dahkhawlna tur Tuizem (syntex) 4 tui litre 2000 theih dawng a awm bawk a, ruahtui dahkhawlna tur RCC tanky tui litre 50,000 dawng siam a ni bawk. Internal leh External Electrification, Sanitary & Water Supply Installation tha takin siam a ni a, 5 KVA Generator dah a ni bawk a, Processing Unit leh Storage vilna tur website development siam a ni a. Overnight Truck Parking Area siam a ni bawk.

Chawngtlai RURBAN Commercial Centre hawnnaah hian Pi Irene Zohlimpuii Chongthu, Addl. Secretary, RD Department, Pu R. Lalthazuala, Director, RD Department leh RD Department official pawimawhte an tel a, Chawngtlai bakah a chhehvel khaw hrang hrang atangin khawtlang hruaitute an tel bawk a ni.

Vawiin inkhawm hi Pi H. Lalchhandami, CEO, MzSRLM in a kaihruai a, Pu Lalthakima Chhangte, BDO, Khawzawl-in technical report a pe a, Chawngtlai VCP Pu H. Lalremsanga'n lawmthu sawina hun hmangin a khar a ni.