951/2023-2024

Kolasib dated 28th June 2023: Vawiin chawhma khan Pu John LT Sanga, Deputy Commissioner, Kolasib district chuan a pisaah Mizoaram Journalist Association, Kolasib member mi 12 hnen ah Press Accreditation Card a hlan a. Pu Hmingthanzuala, DIPRO chuan hun kaihruaiin Pu Andrew VL Auva, President, MJA, Kolasib leh MJA, Kolasib member-te he hun ah hian an tel a ni.

Pu John LT Sanga, Deputy Commissioner chuan mipui ngaihtuahna leh rilru kaihhruaina kawng a chanchinbumite hnathawh pawimawh zia sawiin thlei bik nei lo leh tan bik awm lo a mipuite hnen a thu dik thlen thin a pawimawh thu a sawi a. Thu dik lo theh darh avangin buaina nasa tak a thlen phah thei ang bawkin thu dik theh darh avangin buaina nasa tak thleng tur a ven theih thu a sawi bawk a ni. Chanchinbu enkawl hna chu hna hautak tak, intuai hriam reng ngai leh inzir ngei a nih thu sawiin chutiang hna thawh kawnga Sawrkarin rintlak anga a ngaih, Press Accreditation Card dawng tlak mi 12 lai Kolasib district-in an awm chu lawmawm a tih thu sawiin ram leh hnam tan a rinawm tak a thawk zel turin Deputy Commissioner chuan duhsakna a hlan bawk a ni.

Pu Hmingthanzuala, DIPRO chuan thutharthehdarh hna chu hna zahawm leh rintlak ni zel tur a vawn a nih theih nan The Mizoram Press Representative Accreditation Rules 2014 duan a nih dan te leh Press Accreditation Card dawng tur chuan kum 5 tal Sawrkar hriatpui Media Firm-a thawh a ngaih thu leh he card hi kum 2 chhung dam a nih thu a tarlang a.

Thutharthehdarh hna chu ram tan a rawngbawlna a nih piah lam ah eizawnna tlak a siam a nih theih nan Sawrkar pawhin Advertisement rate mumal takin a bithliah thu a sawi a, dan ang tak a heng rate-te hi kalpui a nih theih nan Sawrkar Department hrang hrangin Advertisement pek chhuah dan kalphung kan hriatchian a pawimawh thu a sawi.

Pu Andrew VL Auva, President, MJA Kolasib chuan lawmthu sawina hun hmangin Pu John LT Sanga, Deputy Commissioner chuan mi 12 hnen ah hian Press Accreditation Card hi a hlan a ni.