Vawiin khan MUP Chawnpui Branch chuan Deputy Chief Minister Pu Tawnluia hovin Chawnpui Presbyterian Kohhran Jubilee Building-ah Upate Ni an hmang.

Pu Tawnluia chuan Upate Ni-ah kalkhawmte chibai bukin Pathian malsawmna avanga MUP member ni thei an nih inhre turin a chah a. Thalai tam tak vui liam an nih laiin kum upa tak thlenga an dam thei chu an vanneih zia hria a, “tar” intia inngaihtuah lungai lovin, kum upa tak thlenga Pathianin damna a pek avanga Pathian hnena lawmthu sawi tur leh an chanvo ropuizia an thinlunga hre turin a fuih. Mizo tlawmngaihna, aia upa zah thiam, hmeichhiate dimdawih, tanpui ngai te tanpui leh Mizo nunzemawi dang tam takte kha thangthar zingah khawvel changkanna avangin a dal tial tial a, Mizo hnam nunphung leh ziarang tundin a nih zel theih nan mahni tu leh fate zirtir hi MUP member-te mawhphurhna leh tihtur pawimawh tak a ni, Deputy Chief Minister chuan a ti. Mizoram sawrkar chuan tar leh upa  te enkawl na kawngah an intihhlim nan leh hun awl an hman that nan hmun hrang hrang ah  MUP Building a sa thin a, Upate Ni pualin tar pension, rualbanlo leh hmeithaite chhawmdawlna National Social Assistance Programme kaltlanga Mizoram Sawrkarin sum fai a tum zat pawh nimina Cabinet Meeting- chuan a leta tihpun a remtih thu Pu Tawnluia chuan a sawi bawk.

Inkhawm hi Pu R.Zakima, MUP Chawnpui Branch President chuan a kaihhruai a. An pawl Secretary Pu R.Kapthanga’n an hmalakna leh hmachhawp te sawiin branch report a pe a, an member thi mi pakua sunna hun an hmang bawk. Chawnpui MUP Branch-ah hian member 280 an awm mek a, Branch hian Area leh Ram pum huap Lengkhawm zai intihsiak ah te lawman an lo la tawh a ni

Upate Ni hi United Nations member ram 193 in an hmang a. December ni 14, 1990 khan UN General Assembly chuan khawvel puma hman turin October ni 1 hi Upate Ni (International Day of Older Persons) atan a puang a ni.