Vawiin khan  Aizawl Press Club-ah Information & Public Relations Department leh Mizoram Journalists Association(MJA) tangkawp chuan Bureau of Parliamentary Studies & Training(BPST), Lok Sabha Secretariat, Parliamentary Complex hmuna Mizoram Sawrkar tirha Parliamentary Studies zu training zo hlim te pualin programme a buatsaih a. He hun hi I&PR Minister Pu Lalruatkima pawhin hmanpuiin MJA member te nen inkawmna an nei chhunzawm nghal a ni.

MJA member te nen an inkawmnaah hian I&PR Minister Pu Lalruatkima chuan Media mite chu mipui hnena thuthar puanchhuah hna thawh piah lama mipuite hnena zirtirna petu an nih avangin mi naran aiin an in zir peih zawk tura a ngaih thu a sawi a.  Mipui thuneihna sawrkar hnuaiah ngat phei chuan Media te pawimawhna a sang hle a. Chuvangin sawrkar pawhin Media mite a duhsak a, a tam thei anga zir bik tur tuk saka training pek, study tour a tirhchhuah leh State chhunga an tlawhtur te pawh siam zel a tum a ni a ti. Sawrkarin Media mite thawhhlawk zia a hria a, an ham thatna te pawh Dan hnuaiah a nih tur ang takin a siam sak tawh bakah a tul anga siam belh te pawh a tum mek a.  Media mi te pawhin an mawhphurhna te an hlen a pawimawh thu sawiin  I&PR kaltlanga sawrkar hmalakna puanzar te pawh  tha taka an lo chhuah sak leh sawrkar scheme hrang hrang te pawh nasa zawka  mipui an zirtir a pawimawh hle a ni a ti.

Communication Technology hmasawnna sang zelah Media him lo - Social Media te pawh a buaithlak tan thu sawiin hemi kawngah pawh Media mite chuan mawhphurhna sang tak an neih tih a sawi a. "Mizoram chhungah ngei pawh Phone  neih vanga Media mi emaw in tia  a him leh him lo, a pawi nge pawi lo, dan phalloh a ni em tih pawn dawn hmasa lova mahni hmuh leh dawn a piang Social Media kaltlanga thawndarh ching an tam a. Hei hian mimal nun tam tak a tihchhiatsaka, mi tam tak rilru a hliam mek a, pawi nasa tak a khawih mek a ni. He thil him lo tak hmachhawn kawngah pawh hian Media miten tihtur leh tihlohtur mipui zirtirna kawngah tan in lak natsat a ngai hle a ni", a ti a. Sawrkar hmalakna chauh puangzar tura a sawm loh thu sawiin sawrkar khalh ngil kawngah pawh thildik tanchhan tur fumfe tak a awm chuan thudik tak puangchhuak ngam turin Media mi ten tihtur an neih tel thu a sawi bawk a ni.

Sawrkar tirhin I&PR Officer 5 leh MJA member 15 te chuan Bureau of Parliamentary Studies & Training(BPST) tuna Parliamentary Research & Training Institute for Democracies(PRIDE) tia hming vuah takah  September 25 leh 27 inkar khan India rama Parliament hnathawh dan an zu zirchiang a.  Training a kal te report pekna hun hi vawiin khan Press Club-ah khunkhan takin buatsaih a ni. He hun hi  Pu Lalremsiama, Vice President, MJA in a kaihruai a. Team Leader Pu Lalramliana Chawngte, Joint Director, I&PR leh Pu Zohmingmawia, General Secretary, MJA te hnen atangin Training Report tlangpui ngaihthlak a ni a. Hemi hnu hian Training a kal te hnen atangin Report kimchang tak ngaihthlak leh a ni a. Pi Lallianpuii, Director, I&PR leh Pu Zonunsanga Khiangte, President, MJA te hnen atangin fuihna thu ngaihthlak a ni bawk a ni.