Vawiin chawhma dar 10:30 am khan National Blood Donation Day chu Mizoram Polytechnic Lungleiah hman a ni a, he hun hi Dr. SR. Ngurchamliana, President AVBD Lunglei chuan kaihruaiin, khuallian Pu Lawmawma Tochhawng, Vice Chairman HPC Lunglei chuan he hun hi a hmanpui a ni.

Pu Lawmawma Tochhawng chuan thu sawiin, vawiin hi hun hlu tak a ni a, a thlawna midangte thisen pekna ni a ni a, sawrkar pawhin nunna inchhan tawn hi a ngaih pawimawh em em a, a mamawhtu ten a thlawna thisen an dawn theihna turin hma a la nghal a, Blood Processing Fee pawh lak a ni ta lo va, chu chuan voluntary-a thisen pek kawngah pawh hma min sawn tir zel a, tun dinhmunah Civil Hospital Lunglei Blood Bank chu a percentage-a lakin pahnihna hial kan ni ta mek hi thil lawmawm tak a ni, a ti. Midangte tana thisen kan pek hi mi nunna kan chhan theihna hlu tak leh pawimawh tak, rawngbawlna hlu tak ni nghal a ni a,  mithiam ten thisen pek a hlauhawm lohna an sawi te hrerengin, midangte tan thisen pek kawngah tan i la thar zel ang u, tiin kal khawm te a sawm a ni.

Chairman Dr. SR. Ngurchamliana chuan mipa puitling hian an taksa rih zawng Kg 1 zelah thisen 70ml an nei a, hmeichhia chuan 66ml zel neiin, thisen pek hi a hlauhawm lova, hriselna atana pawi thei a nih loh thu a sawi.

Pu H. Lalthangliana, Secretary, AVBD report in a tarlan danin, April to August 2019 chhungin Civil hospital Lunglei Blood Bank-ah thisen unit 1225 dawn niin, voluntary 1162 (94.86%) a ni. Christian Hospital Serkawn Blood Bank-ah thisen unit 1002 dawn niin voluntary 826 (82.44%) a nih thu a tarlang.

He hunah (June 2018 to June 2019) chhunga thisen pe tha te chawimawina hun hman nghal a ni. Thuziak leh thilpek hlan niin, chawimawina dawngtute chu:

Church Base:

1. Mizoram Thalai Kristian pawl -  1048 unit
2. District Pentecostal Youth Deptt. - 131 unit
3. Adventist Youth fellowship - 77 unit

Institution Base:

1. NSS Government College Lunglei - 193 unit
2. HATIM - 170 unit
3. BHSS - 140 unit

NGO Base:
1. Cherhlun Branch YMA - 52 unit
2. Serkawn Branch YMA - 51 unit
3. Peniel Hnahthial Branch YMA - 41 unit

Other Base:

1. MNYF Hnahthial Block l - 69 unit
2. Bunghmun Volley Club - 11 unit
3. Leitlangpui Pachuau Inpui - 9 unit

Mimal vawi 3 pe chinte:

1. HMS. Dawngliana, Hnahthial Peniel
2. NG. Lalbiakdiki, Bazar Veng, Lunglei
3. Lalnunsanga Sailo, Rahsiveng

He hunah hian Dr. Lucy, Blood Bank Officer, Civil Hospital Lunglei chuan Technical report pein, vawikhatna atana thisen pe turte tana hriat tur tul leh thil pawimawh hrang hrangte sawiin, thisen unit khat kan pek hian mi pathum nunna kan chhan thei a ni, a ti. Rosaline Vanlalmalsawmkimi hnen atangin zai ngaihthlak a nih bakah, Nursing School Lunglei zirlai ten Special Item entirin, Pi HK. Lallianzauvi, ECM, AVBD Lunglei chuan lawmthu sawina hun  hmangin he hun hi tihtawp a ni.