2271/2026-2027

Dated Champhai the 18th September 2026: Vawiin khan Pu TBC Lalvenchhunga, Adviser to CM (Finance) chuan Mizoram KVI Board buatsaih, Samarath Scheme hnuaia puanṭhui zirna chu Champhai Press Club-ah hawnna hun a hmanpui a, Chief Executive Officer, MKVIB Pu Hnamhlunchhunga chuan hawnna hun hi a kaihruai a ni.

Pu TBC Lalvenchhunga chuan thu sawiin, MKVIB hian thalaiten thiamna an neih theihnan kawng hrang hrangin training an buatsaih thin a. Central scheme ṭha tak tak an paw chhuak a, chu chu kan ram thalaite hman tangkai theih tura an duang hi thil lawmawm tak a ni a. An hmalakna rah chhuah kum hnih chhung leka hmuh theih a ni hian an hnathawh ṭhatdan a pho lang hle a ni, a ti.

Trainee te fuihin, zirlai kan ni ṭha leh dawn a. Thiamna leh changkanna rawn chhuak thar zel avangin zir zawh a awm thei tak tak lova. Changkanna mila kan thiamna te kan her rem loh chuan hman tlak lovah a chhuak mai ṭhin, a ti a. Hmasawn duhna rilru pu a, taimakna leh thawhrimnate a hman hun hre tur te, an thiamna te mimal, chhungkua leh khawtlang hmasawnna atana hmang tangkai turin a chah a. Eizawnna kawngah pawh sawrkar atanga hamṭhatna awm thei te hmang ṭangkai a, hmasawn zel tum turin a fuih a. Training hlawhtling tak nei turin duhsakna a hlan a ni.

Pu C.Lalremliana, Chairman MKVIB pawhin thu sawiin, tun dinhmunah thiamna nei turin training chi hrang hrang 11 chu Zemabawka an training centre-ah kalpui mek a ni a. Plumbing leh mobile repairing zirna lam pawh zauh tum a ni a. Hei bakah hian ram dangin Mizoram min mamawhna tur muga chin te, rubber chin leh khuai khawi lamah te pawh hmalak a ni a. Kan ram tana thil tha hnutchhiah kan tum a ni, a ti.

Samarath Scheme hnuaia training hi Champhai District tan hmun thum: Ruantlang, Tlangsam leh Electric Vengah te neih tur a ni a. Trainer mi 72 (Ruantlang-35, Tlangsam-25 leh Electric Veng-23) te chuan darkar 300 chhung puanthui hi an zir dawn a ni. MKVIB hian hetiang training hi Aizawlah ṭum khat leh Lungleiah ṭum hnih nei tawhin, Lungleiah hian 3rd batch a kal mek a. Training chhuakte hnenah hian puanthui khawl an pe thin a ni.