2272/2026-2027

18th September, 2026: Education Minister Dr Vanlalthlana chuan North East Education Conclave 2026, J.P. Park & Banquets, Naga United Village, Chümoukedima, Nagaland-a neih mekah Mizoramin education-a hmasawnna hrang hrang a hmuh te leh NEP 2020 chungchanga chona an hmachhawn dan te a sawi a. Education hmasawnna atana ruahmanna siam kawngah State lian zawkte anga hmarchhak state te khairual mai lo turin sawrkar laipui a ngen a, heng state-ten harsatna inangtlang an tawh sutkian pui turin a ngen.

Dr Vanlalthlana chuan Mizoram chauh ni lo, hmar chhak state dangah pawh sawrkar school-a lut duh naupang an tlem thu te, a pawl hniam lamah school naupang tlemte chauh neia elementary school engemawzat a awm laia secondary school chin nei thei thingtlang khua an tlem thu te, DIET leh SCERT an neihah thawktu indaihlohna a nasat thu te, solar power leh internet connectivity chungchanga harsatna te, education hmasawnna atana thawktu lak belh kawngah leh hmasawnna ruhrel din kawngah finance lama harsatna an tawh te chinfel pui turin a ngen a. Heng harsatna an tawh te hi Mizoram state ah bik chauh ni loin, hmar chhak state tam zawk harsatna a ni tih hriatpui tur leh, a sutkian dan ngaihtuahpui turin sawrkar laipui a ngen a ni.

Zirtirtu thiam leh tha la tura an hmalakna sawiin Dr Vanlalthlana chuan Standardised Assessment for Elementary Schools an kalpui thu te, Vidya Samiksha Kendra an hman tangkai thu te, school zirlaiten an puitlin huna sum leh pai enkawl dan leh sumdawnna kawnga hma an lak dan tur inzirtirna Project Intodelh an kalpui thu te he hunah hian a sawi a ni.

Mizoram atanga palai kal te hian Mizoram state-a Samagra Shiksha 3.0 kalpui tura rawtna te, PM-USHA chungchanga rawtna te, kan ram leilung leh a chhunga chengte khawsak dan mila education hmasawnna hna thawh dan tur rawtna te he conclave-ah hian an thehlut a ni.

Education Minister hi Dr Vanlalthlana hi Prof. Lalbiakdiki Hnamte, Working Chairman, Mizoram Education Reforms Committee; Pi Caroline Zoramthangi, Director, SCERT; Dr Lalduhawmi Thomte, Joint Director, Directorate of School Education/SCERT; Pu C. Lalthanzira, State Project Director, Samagra Shiksha; Prof. C. Zarzoliana, Additional State Project Director, PM-USHA, Higher & Technical Education; leh Er. S. Zorinliana, Academic Officer, Higher & Technical Education ten an tawiawm a ni.