2273/2026-2027

Lunglei, 2026 Mimkut Thla ni 18: September ni 17 aṭanga October ni 2, 2026 inkar chhunga India ram puma Faina Beihpui Thlak (Swachhata Hi Seva) kal mekah vawiin khan Lunglei Municipal Council (LMC) huaihawtin Lunglei Bazar hmunhma tihfai a ni a. LMC hnuaia Sanitation Worker-te'n Bazar tihfai hna hi thawkin, hemi rual hian Solid Waste Management (SWM) Rules, 2026-in a sawi angin bawlhhlawh chi 4-a thliar hran dan inzirtirna an buatsaih nghal bawk.

Lunglei Municipal Council Chairman Pu Lalzuithanga chuan Swachhata Hi Seva 2026 pualin mipuite thu chahin, SWM Rules 2026-in bawlhhlawh thliar hran dan chi li a ruahman angin wet waste (ṭawih thei) chu bawlhhlawh bawm hringah, dry waste (ṭawih thei lo leh hman nawn theih) chu bawm pawlah, sanitary waste (mihring thli) chu uluk taka fun hnuah bawm senah leh fimkhur ngai thil bawlhhlawh, hazardous/special waste (damdawi, electric leh rawng lam chi) chu bawm dumah paih tur tih chu mipuite'n mahni inah ṭheuh bul ṭan turin a ngen a. Swachhata Hi Seva kalpui a nih chhungin Lunglei mipuite chu mahni in leh a vel faina kawngah hma la ṭheuh tura ngenin, faina kawnga bul ṭantu leh hma hruaitu nih tum ṭheuh turin a chah.

Urban Development & Poverty Alleviation (UD&PA) Lunglei leh LMC bul tumin Swachhata Hi Seva 2026 kalpui chhung hian faina lamah kawng hrang hranga hma lak a ni dawn a. Lunglei khawpui chhunga Local Council tinte'n an huam chhungah faina beihpui an thlak dawn bakah, khawpui chhung hmun pawimawh lai bik tihfai hnatlang thawh ṭhin a ni dawn a. Hmun hrang hrangah bawlhhlawh thliar hran dan thar leh faina chungchang inzirtirna kalpui a ni bawk ang.