No.7971/2020-2021

Aizawl the 31st March, 2021 : Vawiin khan Transport Minister Pu TJ Lalnuntluanga’n Aizawl City Bus Owners’ Association (ACBOA) General Assembly vawi 47-na, Synod Conference Centre, Aizawla neih chu khuallian niin a hmanpui.

Pu TJ Lalnuntluanga chuan ACBOA hruaitute nen thawhhona tha tak neia hma an lak thin thu a sawi a. Aizawl Smart City Project kalpui mekah Urbanization Scheme hnuaia peng pawimawh tak Urban Transport chungchanga hmalaknaah pawh Aizawlin hmel thar a hmuh theih nan finchhuah thin turin a sawm a ni. City bus te chu Mizoram hmel lanna pawimawh tak pakhat an nih avangin bus vawn fai leh enkawl that kawngah te, passenger te chunga hawihhawm kawngah te tan la lehzual turin Minister chuan a fuih a. Rinawm taka chhiah pek hi sawrkar neitu kan nihzia tilangtu leh khua leh tui tha te mawphurhna a nih tih hriaa a hun takah pe thin turin a chah bawk a ni.

ACBOA ten Special Road Permit lak danah harsatna an tawk thin tih a hriatpui thu Transport Minister chuan a sawi a. Hemi chungchangah hian officer ruat bik te neiin online kaltlanga awlsam zawka tih fel dan ngaihtuah mek a nih thu a sawi a. Transport Department hnuaia chhiah chi hrang hrang, online-a pek a nih theih nan State Bank of India nen inremna siamin, reiloteah hman theih a nih tur thu Pu TJ Lalnuntluanga chuan a sawi a. State Transport Authority in bus fare tihdanglam chungchang a rel pawh sawrkarin a pawmpui thuai tur thu a sawi bawk. Minister chuan ACBOA te chu khawmpui hlawhtling taka hmang turin duhsakna a hlan a. Kum kaltaah hripui avanga harsatna nasa tak thlengah bus driver leh conductor te mahni nunna thapin an pen chhuak a, kan unau tangkhang lo haw te phurtuah tangin sawrkar leh mipui tan theih tawp an chhuah tih sawiin lawmthu a sawi bawk a ni.

ACBOA khawmpui hi an president Pu Malsawma Chuauhang chuan a kaihruai a, an hmalak dan report hrang hrang ngaihthlak a nih bakah an member chatuan ram pan ta mi 4 sunna hun hman a ni. Chawhnu lamah rorel leh hruaitu thar thlanna hun an hmang zui nghal bawk.