No.7972/2020-2021

Vawiin khan Tourism Department buatsaih Graduation Ceremony & Felicitation of Tour Guide chu Vanapa Hall-ah hman a ni a, Tourism Minister Pu Robert Romawia Royte chu khuallian niin, Pu T.C Pachhunga, Vice Chairman Sports, Youth Affairs ICT and Tourism Board chu khualzahawm a ni.

Programme hi Pi K Lalrinzuali, IAS Special Secretary Tourism Department chuan kaihruaiin Tour guide training mi 103 zinga pass chhuak mi 83 hnenah Tour Guide License pek an ni.

Khuallian Pu Robert Romawia Royte chuan Covid-19 hripui hi tourism leh industry sector hian a tuar nasa bik niin a langa, khualzin an chawl a, hotel, restaurant te khar a ngai a, Tourism Department hi Covid hripui dona-ah thawhhlawk department an ni, a ti. Tourist Lodge te Quarantine Facility, CCC, Community Quarantine-ah sorkar in a hmang a, tourist lodge a thawkte pawh hengah hian hman tangkai an ni a, Covid-19 hripui tuartu anih piah lamah Tourism Department chu a donna kawngah hlawk taka thawk department a ni, tiin a sawi. Minister chuan mumal takin tourism industry hi a kal dawn niin a lang a, policy pawh a taka hmanga zarzo tur zingah tour guide, tour operators, travel agency te bakah mahni a eizawng (private players) te an tel a ni, a ti a. Tourism industry chu thang mek, thang zel tur, limit pawh neilo a ni tiin a sawi bawk a ni. Vawiina tourist guide train chhuak te hian tourist pakhat hlim taka an haw tir hian tourism sawm dang a rawn hruailut thei a ni tih hi rilruah paiin, hre reng ila, khualzinte nen inkawm ngaihna inthian thatna siam zel turin a fuih a ni.

Tour guide training-a senso hi Mizoram Youth Commission kaltlangin NEC atangin Rs. 13 lakhs hmuh a ni. Training programme hi Livelihood Generation For Returned Migrant Workers Due To Pandemic Covid-19 Outbreak In Mizoram hnuaiah mi 100 tana training pek tura buatsaih a ni a, amaherawhchu diltu - Returned Migrant workers te hi mi 100 an tlin loh avangin open advertisement chhuah a ni a, MzSRLM hnuaia Self Help Group member te pawh train tel an ni. Tour guide training hi thlakhat chhung kalpui a ni a, hemi chhung hian theory class mai bakah personality development class, soft skills training, group exercise te leh field training te neih pui an ni. Training tawpah hian theory exam, practical exam leh interview buatsaih leh niin exam pe mi 95 zinga mi 83 te chu Mizoram a Tour Guide batch hmasa ber ni tura thlan tlin an ni. Mi 95 atanga mi 12 erawh chu examnination paltlang leh tura duan an ni.

Tour Guide license pek te hi eizawnna mumal tak an lo neih ve theih nan Mizoram Sorkar in an hlawh tur guide fee a duang anga. Mizoram leh State pawn atanga khualzin lo kal te hnen atangin sum leh pai lak luhna remchang an lo hmu ve thei tawh dawn a ni.