110/2022-2023

Champhai, the 9th April, 2022: Law & Judicial, Environment Forest & Climate Change, Transport  leh Parliamentary Affairs changtu Minister Pu T.J. Lalnuntluanga chuan  Champhaiah District Court Complex sakna tur leh Conservator of Forests (CF) Office leh chenna sakna tur hmunhmate tukin khan a tlawh a, hemi hnu hian Khelthliahlui tuilakna tur a tlawh bawk a. Official-te leh khawtlang hruaitute nen inrawnkhawmna leh hmalak dan turte an sawiho a ni.

Champhai Vengsang Mualbawk rama YMA Field hmun  leh a chhehvel District Court hmun tura ruat a enfiahnaah Law & Judicial Minister chuan tunlai thiamna leh model thar ber hmanga District Court Complex Champhai siam tum a nih thu leh, Mizorama hmasa ber, zahawm leh model ni thei tura ruahmanna siam a ni, a ti a. Senso leh hmalak dan turte tha taka duangin Sawrkar laipuiah thlen tum a nih thu leh ruahmanna siam kawngah zirchian nan Judicial Officers leh Architect-te nen Delhi District Court, Saket an tlawh thu a sawi bawk.

Environment Forest & Climate Change Department changtu Minister ni bawk chuan Divisional Forest Officer (DFO)  chung Conservator of Forests (CF) Eastern Circle Champhaia dahfel tura ruahmanna siam fel a nih tawh thu sawiin, CF Office leh Quarter sakna tur sum dahfel a nih tawh thu leh tul angte buaipui fel a nih veleh hna tan thuai tum a ni, a ti a. Office sak chhunga luah lailawk tur atan RO Quarter cheibawl tum a nih thu a sawi bawk.

Champhai South bialtu MLA Pu T.J. Lalnuntluanga chuan Ruantlang leh Mualveng tuilakna tura ruahman Khelthliahlui chu a hmunah kalin a tlawh bawk a. Champhaia tui harsa chho mek zel tihziaawm a nih theih nan theihtawp chhuah mek zel a nih thu sawiin, Dilkawn leh Zokhawtharah tui connection pek tan niin, Melbuk leh Zotlangah kalpui chhoh mek a ni, a ti a. Ruantlang leh Mual Vengah tui  mamawh duh anga neih a a nih loh avangin Saisihlui atanga lak dan tur kum 2019 ah en a ni a, duhthusam a nih loh avangin Khelthliahlui nena an infin hnu tui tam zawkna chu nizung chakna hmang tangkaia lak tum a ni, a ti a. PHE Department-in zirchianna an neih atangin project an siam ang a, chak taka bawhzui tum a ni a, a hlawhtlin theih hunah chuan tui hnianghnar zawk kan nei thei dawn a ni, a ti bawk.

Vawiin chetvelnaah hian Minister Pu T.J. Lalnuntluanga hi District Bawrhsap Pu James Lalrinchhana bakah Law & Judicial, Forest, PWD, Revenue leh PHE Department hotuten an tawiawm a ni.