3450/2022-2023

Champhai, the 2nd February, 2023: Law & Judicial Minister Pu T.J. Lalnuntluanga chuan tukin dar 6:30 khan District Hospital Champhaia tlawhin RT PCR bun hna thawh mek, Trauma Centre sak mek leh Nursing School Champhai kalpui thuai anih theih nana tulte a enfiah.

Hmalakna hrang hrangte a enfiahnaah Minister Pu T.J. Lalnuntluanga chuan thu sawiin, thlen chin leh hmabakte bakah harsatna tawhte inhrilhhriat zung zung a pawimawh thu sawiin, mutante hriata bawhzui tlan zel a pawimawh thu a sawi a. Office dawhkan kila sawiho mai lovin official, contractor, engineer, khawtlang hruaitu leh media lamte nena a hmuna en ho chuan awmzia thui tak a neih thu a sawi a. Mipuiin an nghahhlelh leh ngaihchan reng hmasawnna ruhrel pawimawh tak takte an nih hlawm avangin theihtawp chhuaha tangruala a rang lama zo thei tura bawhzui tlan a tul thu a sawi bawk. Bawhzui ngai hriat tlan angaih thu sawiin, khawtlang tana tha turte bawhzui tlan zel puiah kalkhawmte a sawm a ni.

Eye Ward building-a RT PCR khawl bun nana  hmunhma cheibawl thawh mek hi cheng nuai 18 bawr senna tur niin za zela 90 dawn zawh fel tawh a ni. Bungruate a thleng kim deuh vek tawh a, hmunhma peihfel veleh bun hna thawh nghal tum a ni. Hemi hnu hian Ministry of H&FW sum cheng nuai 81 senga sak mek Trauma Centre, Hospital Casualty nena sak zawm mek pawh tlawhin hmalak tawhna leh harsatna awmte a hmunah sawiho a ni a. Engemaw hriatfiah tawk lohna avanga harsatna awmte pawh a rang lama bawhzuia chinfel thuai dan turte relho a ni bawk. Hna hi za zela 90 dawn vel zawh fel tawh niin, Trauma Centre-a dah tur ICU khum 10, Ventilator unit 2, Bipap unit 2, Monitor para 5, 2-function ICU cots unit 10, Syringe pump unit 2 leh Infusion pump unit 2 te pawh Give Foundation & Mission ICU ațangin District Hospital Champhai a thleng fel tawh a, Minister hian Store Room tlawhin bungruate hi a enfiah nghal bawk.

Law& Judicial Minister hian Nursing School Building pawh tlawhin kumin chhung ngeia class kalpui anih theih nana hmalak tulte sawihoa enfiah a ni a. Post creation tihfel tawh niin, bungraw mamawh lei tul cheng nuai 100 man dawnte thehlut fel tawh a ni bawk a. Hengte hi pawma pek chhuah anih veleh Nursing School kalpui tura tulte tifel bawkin, niin, kumin chhung ngeia class tan hman tuma hmalak a ni. Nursing Hostel sak mek pawh tlawhin hnathawh dante a enfiah a, contractor te hna tlo leh tha hun bituk chhunga zo turin a chah a ni.

Heng bakah hian Pu T.J. Lalnuntluanga chuan PM CARES Fund atanga siam minute khata Oxygen litre 500 pe chhuak thei PSA Oxygen Plant leh Suction Machine, Eye Ward Building Ground Floor-a bunte a tlawh a. Khawl te zawk leh enkawl awlsam deuh tur zawk PSA Oxygen Plant 200 lpm bun tura ruahmann neih anih thu a sawi bawk.

Law & Judicial Minister hi District Bawrhsap Pu James Lalrinchhana; Dr. H.Lianthangpuia, Jt. Director, H&FW; Er. R.Laltleipuia, AE (DHME), Dr. R.Lianmawia CMO, Dr. Zatluanga DMS, Offical dangte, khawtlang hruaitute leh Chanchinbumiten an tawiawm a ni.

Environment, Forest & Climate Change changtu Minister ni bawk Pu T.J. Lalnuntluanga chuan nimin tlai khan Champhai Bethel Veng EF&CC Complex-a Conservator of Forest (CF), Eastern Circle Office sak mek pawh tlawin hmalak tawh dante bakah hmalak zel kawnga tulte a enfiah a ni.