3451/2022-2023

Aizawl, 02.02.2023: Kumina Chapchar Kut lawmna Aizawla neih tura B20 meeting delegates te sawm chungchangah vawiin khan Chief Minister Pu Zoramthanga hovin CM Office Conference Hall-ah Chapchar Kut Organizing Committee OB leh G20 Mizoram Core Committee te an thukhawm.

G20 hnuaia committee pakhat B20 meeting chu March ni 2 hian Aizawlah nghah a ni dawn a. Ram hrang hrang atanga he meeting avanga rawn kal tur te chu March ni 1 ah lo thlengin, ni 3 ah let leh tur an ni a. Chapchar Kut Organizing Committee chuan heng delegates te hi Kut chhim ve tura sawm ve ni se tiin a lo rel tawh a, G20 meeting organizer lam pawhin delegates ten Mizo kut lian ber an telpui chu tha an ti a. Chumi bawhzui chuan vawiin meeting-ah hian Chapchar Kut hman dan tur ruahmanna lo awm sa tawhte thlir ho in, siam danglam ngai te siam danglam a ni.

Meeting-ah hian B20 meeting neih dan tur leh delegates te awm dan tur te, sawkar inpuahchahna leh hmabak la awm te thlir ho a ni a. Kut lawm dan tur programme committee ten ruahmanna an lo siam tawh chu en ho a ni bawk a. G20 delegates leh state pawn ami te'n Mizo culture an temchhin ve theihna tur te, mikhual te lo lawm dan tur leh traffic kal dan tur thlengin uluk taka sawihona neih a ni. Heng mikhualte avanga sum sen belh tur mamawh chu estimate siamin, a remchan anga sawrkar laipuia dil ni se tih a ni bawk.

India in G20 Presidency a chelh chhung hian meeting hrang hrang 200 chuan India khawpui hrang hrangah nghah a ni dawn a. Vawiin meeting a core committee hi Chief Coordinator Mizoram Dr. Renu Sharma, Chief Secretary a ni.