3452/2022-2023

Aizawl, 2nd February, 2023 : Tun laiin India ram hmun hrang hranga hnam hnufual zawk leh sakhaw tenau zawk te zingah India sawrkarin sakhaw tin leh hnam tinte hrût rualna tur dân Uniform Civil Code hman a tum niin thu a thang nasa hle a.

Hemi chungchangah hian Mizoram Rajya Sabha MP Pu K.Vanlalvena chuan Union Law and Justice Minister Pu Kiren Rijiju chhan atan hetiang hian zawhna a pe a :

1) Sawrkar laipui hian Uniform Civil Code Bill passed tumna a nei em?.

2) Nei ta se MNF leh India inremna thuthlung avanga siam India constitution article 371(G) hi a nghawng buai thei ang em? 3) Nei ta se India rama hnam hrang hrang te hnam dan, customary law te hi UCC chuan a palzut ang em?

Union Minister of Law and Justice Pu  Kiren Rijiju chuan Pu Vena zawhna te hi chhangin India sawrkar chuan 21st Law Commission of India hnenah Uniform Civil Code in a nghawng theih tur thil chi hrang hrang te lo zir chiang a chumi zulzuia rawtna siam turin ngenna a lo thlen tawh thu te, Law Commission hotu te chuan 21st Law Commission of India term chu Dt 31.8.2018 ah a tawp tawh thu leh 22nd Law Commission in a la ngaihtuah zawk tur nia a lan thuin an rawn chhan thu te a sawi a. Hemi a nih avang hian tun dinhmunah Uniform Civil Code hman tumna engmah a awm lo, tiin Pu K.Vanlalvena zawhna te hi ziakin vawiin ah a chhang a ni.