3453/2022-2023

Siaha; the 2nd February,2023: Mizoram-a District dang te rualin Siaha town chhungah pawh tukin chawhma dar 10:00Am-ah khan Siren tihrik a, Mock drill on Earthquake disaster hi neih tan nghal a ni. Vawiin Earthquake Mock Drill-ah hian Lirnghing nat zawng, rei zawng, thlen hun etc leh a thil khawichhiat dan (Scenerio) leh Lirnghing in chhiatna a thlen te lo hmachhawn dan(Incident Action Plan) te enchhin a ni dawn a ni.

SCENERIO: Vawiin chawhma dar 10:00Am-ah khan LIRNGHING Magnitude 8.7 a nâ chuan Minute 1(60second) chhung Siaha khawpui chu a sawinghing a, chu chuan hmun hrang hrangah :
1) Leimin a siam
2)Kangmei a tichhuak
3)Building chhung leh pawhah mi delh hlum thei thil rit tam tak a ti tla
4) Building a ti chim
5) Mihring inhliamna leh thihna a thlen
6)Kawng a ti ping
7)Inbiakpawhna a ti chhia(Landline leh Mobile)
8)Tui leh Electric connection a ti chhe ta a ni.
Earthquake Mock drill hi Siaha Town hmun 5:
1) District Hospital
2) PWD Office
3) Lorrain Market
4)Gov't Siaha H/S
5) Residential Building ah te neih a ni a. Heng hmun 5-ah te hian Lirnghing in a chhiatna hrang hrang a thlen theih te a thleng a, hliam leh Nunna chan ta pawh an awm nual a ni.

INCIDENT ACTION PLAN

District Disaster Management Authority (DDMA) a puipa te chuan Chairman leh District bawrhsap ni bawk Pu Lalsangliana kaihruaina hnuaiah DEOC(District Emergency Operation Centre) ah inkulhin, Incident commander te thu lo thlen lo dawng sawngin tihtur pawimawh te chu Staging Area leh Relief Camp lamah te an hrilhhriat nghal zung zung zel ta a ni.Debriefing huna chhiatna chungchang detail report petu tur observer te pawh chhiatna thlenna hmunah tir an ni bawk.

Vawiin Mock Drill on Earthquake Disaster -ah hian Dept. hrang hrang a Officer leh Staff te bakah Mock Drill neihna area huam chhunga VC leh NGOs(MTP & MCHP) ten mawhphurhna chanvo hrang hrang insemin Mock Drill hi hlawhtling tak kalpui a ni.

Vawiin Mock Drill hi a tak ang theih ber tur leh tha taka  kalpui duh avang hian tahrik 31/01/2023 khan CS hovin Tabletop Excercise pawh lo ti tawh niin, nimin 01/02/2023 ah pawh khunkhan takin mawhphurhna nei te hnenah briefing lo pek vek tawh a ni bawk.